Эстонияда рус тили ва рус адабиётига қарши курашиш учун ҳеч қандай сабаб йўқ, лекин мамлакат эстон тилидаги таълимга ўтиши зарур. Бу ҳақда Эстония президенти Алар Карис ETV+ телеканалига берган интервьюсида айтиб ўтди.
«Менимча, инсон қанча кўп тил билса, шунча яхши. Мен тиллар билан курашиш учун ҳеч қандай сабаб кўрмаяпман. Рус тилининг ўзи маданий тил. Уни бошқа тилларга қараганда эртароқ ўрганиш керак, чунки унинг алифбоси бошқача ва уни ўзлаштириш қийинроқ. Ҳарқалай ўқитувчилар шундай дейди. Рус адабиётига қарши курашиш учун асос йўқлиги каби тиллар билан курашишга ҳам сабаб йўқ», — дейди Карис.
Бироқ унинг сўзларига кўра, мамлакат мактабларида эстон тилида таълим ҳали жорий этилмагани ачинарли. «Ёшлар ҳеч бўлмаганда маҳаллий ҳаёт масалаларини муҳокама қилишда қатнашиш учун эстон тилини ўрганиши керак», — деди у.
2022 йил декабрь ойида Эстония Таълим ва фан вазирлиги рус мактабларини эстон тилидаги таълимга ўтказиш режасини тасдиқлаган эди. Режага кўра, 2024—2025-ўқув йилида боғчалар, шунингдек, умумтаълим мактабларининг биринчи ва тўртинчи синфлари аввало эстон тилида ўқитишга ўтади. Эстон тилидаги таълимга тўлиқ ўтиш 2029 йилда бошланадиган ўқув йили бошига қадар якунланиши керак.
Бундан ташқари, республикада меҳнатга лаёқатли фуқароларга давлат тилини билмаслик ёки етарли даражада билмаслик учун жарима солишга (жарима 640 еврогача етиши мумкин) рухсат берувчи тил қонуни мавжуд. Қонун ижросини назорат қилиш Тил инспекцияси томонидан амалга оширилади.
Россиянинг Украинадаги босқини бошланганидан кўп ўтмай, Эстония ҳукумати россияликларга туристик Шенген визаси билан мамлакатга киришни тақиқлади ва Россия режимини террорчи деб эълон қилди. Август ойида Эстония таълим вазири Тонис Лукас мактабларда рус тилини иккинчи чет тили сифатида ўрганишни бекор қилишга чақирди. Унинг қайд этишича, Украинадаги воқеалар фонида айрим ота-оналар боланинг рус тилини ўрганиши кераклигидан норози эканини билдирган.
Изоҳ (0)