АҚШ президенти Жо Байден билан учрашувда Украина президенти Владимир Зеленский Киевга узоқ масофали ATACMS ракеталарини етказиб бериш масаласини кўтарган. ОАВлар шундай қурол етказиш ҳақидаги келишувлар Зеленскийнинг Вашингтонга ташрифидан кўзланган асосий мақсад бўлгани ҳақида ёзганди. Politico ўз манбаларига таяниб хабар беришича, АҚШ бундай қурол вазият кескинлашишига сабаб бўлиши мумкин, деган позициясини сақлаб қолган ва фикрини ўзгартирмаган.
«HIMARS етказиб берилиши натижасида ўйин қоидалари ўзгарди. Бу Россия уларга мослашиб олишга муваффақ бўлмагунига қадар давом этди... Кейинги босқичда бизга каттароқ масофали қурол керак токи тўрт ой аввал, биринчи марта HIMARS’ни қўлга киритганимизда эришган муваффақиятларимизни такрорлашимиз учун. Худди шу нарсани амалга оширишимиз ммукин, лекин ҳаракаталр радиус каттароқ бўлиши керак», — деганди Украина Миллий хавфсизлик ва мудофаа кенгаши собиқ котиби. Politico ўз мақоласида унинг баёнотига таянмоқда.
АҚШ армиясининг Европадаги собиқ қўмондони Бен Хожес ATACMS ракеталари айнан ҳозир зарур бўлган нарса эканини айтганди. Унинг сўзларига кўра, каттароқ масофали қурол Украинага Керч кўприги, Қримдаги Россия авиабазалари ва алоқа линиялари каби Россиянинг муҳим позицияларига ҳужум қилиш имконини берган бўларди. Politico ёзишича, Оқ уй Украинага ATACMS етказиб беришдан бутунлай бош тортган, чунки бу қуролни «вазиятни кескинлаштирувчи» деб ҳисоблайди.
«Биз Украинага ҳозир етказиб берилаётган қуроллардан тубдан фарқ қилувчи қурол-яроғни етказиб беришимиз ҳақидаги ғоя НАТОнинг қулаши ҳамда Евроиттифоқ ва қолган дунёнинг парчаланиб кетиши истиқболларига эга бўлган бўларди», — деган эди Байден Зеленский билан қўшма матбуот анжуманида. Унинг сўзларига кўра, НАТО ва Евроиттифоқ «Россия билан урушга қўшилмоқчи эмас ва учинчи жаҳон уруши бошланишини истамайди».
Эслатиб ўтамиз, Владимир Зеленский 21 декабрь куни эълон қилинмаган ташриф билан Вашингтонга келди. Ташриф доирасида Америка етакчиси билан музокаралар ўтказди, шунингдек, АҚШ Конгрессида нутқ сўзлади.
Кейинроқ эса The Washington Post газетаси Зеленский АҚШга ташрифидан кўзланган мақсадга эриша олмагани, у ҳужум операцияларини олиб бориш учун замонавийроқ қурол-яроғлар олишни режалаштиргани ҳақида ёзганди.
Изоҳ (0)