Чеченистон президенти Рамзан Қодиров Россия президентлигига номзодини қўйиш ҳуқуқига эга бўлса-да, бундай қилмаслигини айтди. Бу ҳақда «РИА Новости» хабар берди.
«Россия фуқаросиман, президентликка номзод бўлишга ҳуқуқим бор. Бошқалар номзодини қўйиши мумкин, чеченларга эса йўқми? Мумкин. Лекин мен ҳеч қачон бундай қилмайман», — деди Чеченистон раҳбари.
У Россиянинг амалдаги президентига узоқ вақт ҳукмронлик қилишини тилаб, унга ёрдам беришга ваъда берди.
Маълумот ўрнида, Украина хавфсизлик хизмати Чеченистон раҳбари Рамзан Қодировни қидирувга берган. У Украина жиноят кодексига кўра, 10 йилдан 15 йилгача озодликдан маҳрум қилишни назарда тутувчи икки модда, яъни тажовузкор уруш ёки агрессив ҳарбий ҳаракатлар бўйича айбланмоқда.
«РИА Новости»га кўра, Чеченистон раҳбари Украина хавфсизлик хизмати томонидан қидирувга берилган биринчи россиялик сиёсатчи эмас. Хусусан Россия ТИВ расмий вакили Мария Захарова Украина ҳудудий яхлитлигига тажовуз қилишда айбланган. Россия Хавфсизлик кенгаши раиси ўринбосари Дмитрий Медведев ва бошқа қатор расмийлар ҳам қидирувга берилган.
Изоҳ (0)