Исроилда Бенямин Нетаньяху бошчилигидаги янги ҳукумат қасамёд қилди. Бу ҳақда Times of Israel хабар берди.
Бош вазирлик лавозимига қайтган «Ликуд» партияси етакчиси Бенямин Нетаньяху 33 нафар вазирлар маҳкамаси аъзоларини таништирди. Бу Исроил тарихидаги энг ўнг қанот ҳукумат ҳисобланади.
«Исроил 37-ҳукуматининг барча янги вазирлари аллақачон қасамёд қилди ва Кнессетнинг бугунги мажлиси якунланди», дейилади хабарда. Собиқ бош вазир Яир Лапид янги ҳукумат раҳбарига қўл бермай Кнессет йиғилишини тарк этган.
Араб дунёсида Исроилнинг янги вазирлар маҳкамаси таркиби муҳокамага сабаб бўлди, чунки унинг таркибига миллий хавфсизлик вазири лавозимини эгаллаб келаётган ўта миллатчи Итамар Бен-Гвир ва «Диний сионизм» партияси раиси Безалел Смотрич ҳам киради.
Бен-Гвир ҳам, Смотрич ҳам Фаластин давлати мавжудлигига қарши ва Исроил ҳудудини Ғарбий Соҳилнинг босиб олинган ҳудудларига кенгайтиришга чақирмоқда. Исроил президенти Исаак Герцог ҳам янги ҳукумат таркибига шубҳа билдирган.
Исроил янги ҳукуматининг асосий вазифалари
Бенямин Нетаньяху Кнессет аъзолари олдида сўзлаган нутқида Исроил ва араблар ўртасидаги можарони ҳал қилиш мутлақ устувор аҳамиятга эга эканини айтди. Муҳим вазифалар қаторидан Эронда ядро қуроли пайдо бўлишининг олдини олиш, Исроилда хавфсизлик билан боғлиқ вазиятни яхшилаш, мамлакатда яшаш харажатларини камайтириш ва тезюрар темир йўл линиясини қуриш киради.
Нетаньяху мухолифат депутатларини «сайловчилар иродасини ҳурмат қилишга ва мағлубиятни қабул қилишга» чақирди.
Изоҳ (0)