АҚШ президенти Жо Байден октябрь ойида бошланган 2023-молия йили учун 1,7 триллион долларлик бюджет лойиҳасини имзолади. Бу ҳақда Оқ уй матбуот хизмати хабар берди.
Twitter’даги постида Америка президенти ушбу қонун лойиҳаси «тарихий тараққиёт йилининг тожи» эканини таъкидлади. Ҳужжат тиббий илмий-тадқиқот муассасаларини таъминлаш, аёлларга нисбатан зўравонликка қарши кураш, Украинага зарурий ёрдам кўрсатиш ва ҳоказоларни назарда тутади, дея эслатди у.
Ҳужжатга кўра, АҚШ мудофаа эҳтиёжлари учун 858 миллиард доллар ажратилади, Украина ва НАТОдаги иттифоқчилар қарийб 45 миллиард доллар миқдорида фавқулодда ёрдам олади. Ушбу маблағнинг қарийб 9 миллиард доллари Украина Қуролли кучларининг турли эҳтиёжлари, жумладан, ўқув машғулотлари, қурол-яроғлар, маошлар ва моддий-техник таъминот учун йўналтирилиши режалаштирилган. Деярли 12 миллиард доллар АҚШ президенти томонидан Украинага юборилган Америка ускуналари ва жиҳозларини Пентагон захиралари ҳисобидан тўлдиришга сарфланади.
Бундан ташқари, у Украина ҳукуматига 13 миллиард доллар иқтисодий ёрдам беради. Бошқа маблағлар инсонпарварлик ва инфратузилма эҳтиёжларини қондириш, шунингдек, Европа қўмондонлиги операцияларини қўллаб-қувватлаш учун сарфланади.
Изоҳ (0)