Россия президенти матбуот котиби Дмитрий Песков журналистларнинг Россия Украина дронлари ҳужумидан ҳимояланганми, деган саволига жавоб бермади. Бу ҳақда «РИА Новости» хабар берди.
Песков президент маъмурияти бу масалалар билан шуғулланмаслигини айтиб, бу савол билан бошқа идорага мурожаат қилишни сўради.
«Сиз менга президент маъмуриятининг алоқаси йўқ бўлган савол беряпсиз. Шунинг учун бу савол билан бошқа идораларга мурожаат қилишни сўрайман», — деди сиёсатчи.
26 декабрь куни Россиянинг ҳаво ҳужумига қарши мудофаа тизимлари Саратовдаги Энгельс ҳарбий аэродромига яқинлашиб келаётган Украина дронини уриб туширди. Дрон қисмларининг қулаши оқибатида уч нафар ҳарбий хизматчи оғир тан жароҳати олди, уч киши ҳалок бўлди. Аэродромдаги самолётларга зарар етмаган.
Ҳодиса сабабли Россия Энгельс'даги қирувчи самолётларини бошқа жойга кўчирмоқчи, бу унинг Украинага ракета зарбалари беришини қийинлаштириши мумкин.
5 декабрь куни Россия Мудофаа вазирлиги Украина Саратов ва Рязань вилоятларидаги ҳарбий аэродромларга дрон билан ҳужум қилишга урингани, оқибатда уч ҳарбий ҳалок бўлганини маълум қилди. Бунга жавобан Россия Украина ҳарбий қўмондонлик ва назорат тизими ва тегишли мудофаа 17 та объектларига кучли зарба берган.
Изоҳ (0)