Хитой АҚШнинг мавжуд дунё тартибини ўзгартиришга қодир ягона рақиби. Бу ҳақда АҚШ давлат котиби ўринбосари Ведант Пател маълум қилди.
«ХХР — халқаро тартибни ўзгартириш ниятида бўлган ягона рақибимиз», — деди Пател. Унинг таъкидлашича, шу мақсадда Хитой иқтисодий, дипломатик, ҳарбий ва технологик қудратини оширмоқда.
Пекин ва Вашингтон ўртасидаги муносабатлар август ойида Вакиллар палатаси спикери Нэнси Пелосининг Тайванга ташрифидан кейин кескинлашган. Хитой Тайван оролнинг мустақиллигини тан олмайди, уни ўз ҳудуди деб билади. Шунинг учун мамлакат бу ташрифни кескин танқид қилди, Тайван ҳудудида ҳарбий машқларни бошлади ва шундан буён мунтазам равишда ҳарбий кучларини орол яқинига олиб бормоқда.
Хитой ҳарбийларининг машғулотларига жавобан Тайван жанговар тайёргарлик даражасини оширди. Орол ҳукумати, шунингдек, армияда хизмат муддатини уч баравар оширишга (тўрт ойдан бир йилгача) қарор қилди ва буни ХХР таҳдиди билан изоҳлади. Қўшма Штатлар Тайван билан расмий дипломатик алоқаларга эга бўлмаса-да, 1979 йилдаги Тайван муносабатлари тўғрисидаги қонунга мувофиқ, орол ўзини ҳимоя қилиши учун унга қурол сотмоқда.
Изоҳ (0)