Эрон шахмат федерацияси Олмаотада тезкор шахмат ва блиц бўйича бўлиб ўтган жаҳон чемпионатида ҳижобсиз қатнашган шахматчи қиз Сара Хадемдан юз ўгирди. Бу ҳақда Arab News Эроннинг Ислом инқилоби посбонлари корпуси назорати остидаги Fars ахборот агентлигига таяниб хабар бермоқда.
«Хадем чемпионатга Эрон федерацияси орқали эмас, балки мустақил, ўз ҳисобидан борди. У бизнинг мамлакатимизга вакиллик қилмайди», — деган ислом республикаси шахмат федерацияси раҳбари Ҳасан Таминий.
Сара Хадем ҳижобсиз қатнашаётгани ҳақида аввалроқ турнирда иштирок этган Reuters журналисти хабар берганди. Маълумки, бу Эроннинг аёллар дресс-коди бўйича қонунларига зиддир.
1997 йилда туғилган Хадем жаҳон рейтингида 804-ўринни, Эрон бўйича эса 10-ўринни эгаллайди. 25—30 декабрь кунлари Олмаотада бўлиб ўтаётган турнирда у рапид ва блиц бўйича мусобақалар иштирокчиси сифатида рўйхатдан ўтган.
Sky News телеканали хабарига кўра, Олмаотадаги жаҳон чемпионатига яна бир эронлик шахматчи қиз — Атуса Пуркашян ҳам рўмолсиз чиққан.
Иккала спортчи ҳам, катта эҳтимол билан, Эронда сентябрь ўрталаридан буён давом этаётган норозилик намойишлари билан бирдамлик белгиси сифатида ўз ҳижозларини ечган.
Эронда 17 сентябрдан бери давом этаётган намойишларда 400 000 га яқин одам ҳибсга олинди. Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.
Тартибсизликлар чоғида хавфсизлик ходимлари томонидан 450 дан ортиқ одам ўлдирилган.
Изоҳ (0)