Коррупция ва уюшган жиноятчиликни ўрганиш халқаро маркази (OCCRP) «Вагнер» хусусий ҳарбий компанияси асосчиси Евгений Пригожинни «Уюшган жиноятчилик ва коррупция» номинациясида «Йил одами» деб эълон қилди. Бу ҳақда марказ матбуот-релизига таяниб, Meduza хабар берди.
«Евгений Пригожин бу йил Россиянинг энг даҳшатли ишлари жонли рамзига айланди. Нопок пуллар, ибтидоий зўравонлик, беадаблик ва ҳатто Россия қонунлари олдида жазосиз қолиш — давлат томонидан тасдиқланган коррупциянинг барча ҳосилалари унинг шахсида бирлашган», — дейилади OCCRP ҳисоботида.
OCCRP бош муҳаррири ва ҳаммуассиси Дрю Салливаннинг айтишича, Пригожин бу «мукофот»га «Россиянинг шафқатсиз ва коррупцион таъсирини кенгайтиришга қаратилган фаолияти, Владимир Путин учун талон-тарож қилишга ва мухолифларни жазолашга тайёрлиги» учун сазовор бўлган.
Марказ ҳисоботида Пригожин томонидан яратилган «Вагнер» гуруҳига алоҳида эътибор қаратилган бўлиб, у «дунё бўйлаб можаро зоналарида қолдирган қонли излари билан танилган»и айтилади. «Вагнер’ жангчилари қаерга борса, ўша ерда албатта, инсон ҳуқуқлари бузилиши кузатилади. Суриядан Камерунгача, Сомалидан Малига қадар улар зўрлаш, талончилик, қотиллик ва қийноқларда айбланмоқда», — дейилади OCCRP ҳисоботида.
OCCRP 2012 йилдан бери уюшган жиноятчилик ва коррупция бўйича «йил одами» мукофотини бериб келади. 2014 йилда марказ ушбу номга Россия президенти Владимир Путинни, 2021 йилда эса Александр Лукашенкони лойиқ деб топган.
«Вагнер» Украинадаги урушда бошиданоқ қатнашиб келмоқда. Унинг ёлланма аскарлари —аксарияти собиқ маҳбуслар кўплаб ҳарбий жиноятларда айбланмоқда.
Изоҳ (0)