АҚШ Patriot тизимларини бошқариш учун Украинага америкалик мутахассисларни юборишни режалаштирмаётгани ҳақида дипломатик каналлар орқали Россияни хабардор қилган. Бу ҳақда Россия ташқи ишлар вазири Сергей Лавров «Биринчи канал»да «Катта ўйин» кўрсатувига берган интервьюсида айтиб ўтди. Вашингтондагилар аниқлик критиишича, бу америкаликлар «Россияга қарши бевосита жанг олиб бормаслиги» билан боғлиқ.
«Бизнинг элчихонамизда ҳозирча сақланиб турган каналлар орқали америкаликлардан Patriot батареясини Украинага бериш қарори, ундан фойдаланиш билан боғлиқ мураккабликларни ҳисобга олганда, у ерга америкалик мутахассислар юборилишини англатадими, йўқми? — деб сўрадик. Бизга режалаштирилмаётганини етарлича муфассил тушунтиришди, чунки америкаликлар тўғридан-тўғри Россияга қарши жанг қилишни истамайди ва бундай қилмайди ҳам, Patriot эса украиналик ҳарбий хизматчилар бу технологияни ўзлаштириб олмагунича, бир неча ойлар мобайнида фойдаланишга топширилади», — деди у.
Аввалроқ АҚШ ушбу ҳаво ҳужумига қарши мудофаа тизими билан ишлаш бўйича украиналик ҳарбийларни ўқитиш дастурини ишлаб чиқаётгани маълум бўлганди. Оддий шароитларда Patriot операторларини тайёрлашга олти ойдан кўпроқ вақт керак бўлади. Украиналик ҳарбийлар учун ўқув дастури Германияда, «Графенвер» полигонида ташкил қилинади.
АҚШдаги Россия элчихонаси Украинада Patriot мажмуалари етказиб берилиши ҳақида хабарлар тарқалгач, АҚШни бу қадамнинг «олдиндан айтиб бўлмайдиган оқибатлари» ҳақида огоҳлантирди.
22 декабрь куни АҚШ Давлат департаменти Украина учун 1,85 миллиард долларлик янги ёрдам пакети ҳақида эълон қилди, унинг доирасида Киев Patriot зенит-ракета мажмуасини қўлга киритади.
Изоҳ (0)