Украина президенти Владимир Зеленский Олий радага анъанавий мурожаат билан чиқди, унинг нутқидан олинган парчаларни Украина ОАВлари келтириб ўтмоқда. Халқ депутати Ярослав Железняк аниқлик киритишича, 28 декабрь куни бутун мамлакат ҳудудида эълон қилинган ҳаво тревогаси туфайли, тадбир бир ярим соатга кечиктирилган.
52 дақиқа давом этган нутқи чоғида Украина президенти Россия билан ҳарбий низодан якуний мақсад — Украина ҳудудий яхлитлигини қайта тиклаш ва асирга тушганларни озод этиш эканини айтди.
«Шу йилнинг тўққиз ойини биз Ғарбга ўзини топиб, глобал майдонга қайтишда ёрдам беришга сарфладик. Европага бутун эркин дунё билан биргаликда ғалаба учун курашаётган битта кучли жамоа сифатида ҳис этишида кўмаклашдик. Айнан Украина Европа Иттифоқини бирлаштирди», — деди Украина президенти «Ички ва ташқи сиёсат асослари тўғрисида»ги мурожаатида.
Зеленскийнинг сўзларига кўра, Украинанинг Евроиттифоққа қўшилиши ҳақида музокараларни бошлаш вақти келмоқда.
Владимир Зеленский Евроиттифоққа қўшилиш ҳақида 28 февраль куни ариза берганди. 23 июнь куни Украина Евроиттифоққа аъзоликка номзод мақомини қўлга киритди. 21 ноябрь куни Украина президенти яна бир марта Ғарб мамлакатларини Киевнинг НАТО ва Евроиттифоққа қўшилиш ҳақидаги сўровини қўллаб-қувватлашга чақирди.
1 июль куни Еврокомиссия раҳбари Урсула фон дер Ляйен Евроиттифоққа аъзо бўлиш учун Украина бир қатор аксилкоррупциявий ва суд ислоҳотларини ўтказиши кераклигини айтди. 21 ноябрь куни Зеленский Евроиттифоққа кириш учун асосий талаблардан бирини бажариб, сиёсатчилар устидан умрбод молиявий мониторингни бекор қилди.
Изоҳ (0)