Беларусь Украинага қарши урушда бевосита қатнашиши эҳтимоли кам. Александр Лукашенко, катта эҳтимол билан, Россия президенти Владимир Путиннинг Украинадаги урушда қатнашиш таклифини рад этган. Урушни тадқиқ қилиш институти (ISW) таҳлилчилари шундай хулосага келди.
ISW Россия ва Беларусь раҳбарлари Украинадаги урушни муҳокама қилишдан тийилганига эътибор қаратди. Шу билан бирга, Минск, гўёки, «Ғарбдан хавфга дуч келгани»ни айтди. Ўз навбатида, Путин беларуслик учувчиларни «махсус жанговар каллаклардан иборат ўқ-дорилар»ни қўллашга ўргатиш имкониятини кўриб чиқишни таклиф қилди.
«Лукашенко Россиянинг Украинадаги ҳаракатларида қатнашишдан узоқ туришга интилиб, Беларусь чегараларини Ғарб ва НАТОдан ҳимоя қилиш ҳақида гапириб келади. Беларусь президенти шунга ўхшаш имо-ишоралардан 17 февраль куни ҳам фойдаланиб, гўёки, Ғарб томонидан тажовуз фонида Беларусга ядро қуроли жойлаштирилиши мумкинлигини айтганди», — дейилади ISW хабарида.
Айни вақтда Лукашенко Москва С-400 ҳаво ҳужумига қарши мудофаа тизимлари ва «Искандер» мажмуаларини тақдим этишини маълум қилди. Россия президенти сўзларига кўра, томонлар, шунингдек, мудофаа маконини яратишни ҳам муҳокама қилган. Шу муносабат билан, таҳлилчилар Лукашенко Беларуснинг Украинага қарши урушга жалб этилишига рози бўлмаган, деган хулосага келди, чунки, акс ҳолда, у ўз гапириш тарзини ўзгартиришига тўғри келган бўларди.
Эслатиб ўтамиз, 19 декабрь куни Россия президенти Владимир Путин бир неча йил ичида биринчи марта Александр Лукашенко билан учрашиш учун Минскка келди.
ISW таҳлилчилари Путин бу билан Украинага қарши урушнинг янги босқичи учун ахборот шароитларини яратишга уринаётганини маълум қилди. Бундан ташқари, Беларусь томонидан ҳужум имкониятлари ҳам истисно қилинмаганди.
Ўз навбатида, Украина Миллий хавфсизлик ва мудофаа хизмати котиби Алексей Даниловнинг фикрича, Путин ўз ташрифи чоғида Лукашенкога босим ўтказиб, унинг Беларусь қўшинларини Украинага қарши урушга юборишга имкон беришига эришмоқчи бўлган, бироқ Минск уруш қилишни истамаган.
Аввалроқ Россия президенти Владимир Путин мамлакатнинг Беларусни «ўзлаштириб олиш», «ўзига сингдириб олиш» режаларини рад этган ва буни сафсата деб атаган эди. «Гап ўзлаштириб олишда эмас, масала иқтисодий сиёсатни келишиб олишда, худди бошқа кўплаб интеграцион бирлашмаларда бўлгани каби», — дея Путин бундай миш-мишлар ҳақидаги саволларга жавоб берди.
Мавзуга доир:
Изоҳ (0)