Россия президенти Владимир Путин ҳарбий хизматчилар ва уларнинг оилаларини ижтимоий қўллаб-қувватлаш бўйича қўшимча чора-тадбирлар тўғрисида фармон имзолади. Унда айтилишича, Москва вилояти, Қрим ва Севастопол маъмуриятлари Украинадаги уруш фахрийларига ер майдонларини беғараз тақдим этишни кўзда тутувчи қонунчилик актларини қабул қилиши керак. Тегишли ҳужжат ҳуқуқий ахборот сайтига жойланди.
Фармон матнига мувофиқ, ер участкаларига давлат мукофотларини олган ҳарбий хизматчилар, шунингдек, уруш вақтида шикастланиб (яраланиб, жароҳатланиб ёки контузия натижасида) ёки касалланиб ҳалок бўлган ҳарбийларнинг қариндошлари даъвогарлик қилиши мумкин.
Сентябрь бошида бундай ташаббус билан Россия Мудофаа вазирлиги чиққан эди.
Украинада уруш бошланганидан кейин Россия ҳукумати жанговар ҳаракатлар иштирокчилари учун турли имтиёзларни кўзда тутувчи бир қатор қонунларни қабул қилди. Хусусан, мартда Путин имзолаган қонунга кўра, Украинадаги уруш қатнашчиларининг барчаси ҳарбий ҳаракатлар фахрийси мақомига эга бўлди. Ушбу мақом солиқ, транспорт, ер-мулк, уй-жой бўйича ижтимоий кўмак олиш, шунингдек, коммунал тўловлар бўйича имтиёзлар ҳуқуқини беради.
Кейинроқ урушда қатнашган ҳарбий бўлмаган шахслар учун фахрий мақоми ҳақида қонун қабул қилинди. Август бошида Путин «Россия ҳудудига қуролли ҳужумни қайтариш бўйича топшириқларни бажарган» Федерал хавфсизлик хизмати ходимлари учун жанговар ҳаракатлар фахрийси мақоми ҳақидаги қонунни имзолади. Декабрда Россия президенти ҳарбий хизмат мобайнида меҳнат шартномаси муддати тугаган тақдирда, сафарбар этилганларга эгаллаб турган лавозимларига қайтиш имконини берувчи қонунни имзолади.
Изоҳ (0)