Россия президенти Владимир Путин Хавфсизлик органлари ходимлари куни муносабати билан йўллаган табригида мамлакат контрразведка кучларини хорижий махсус хизматларнинг ҳаракатларини тўхтатишга чақирди. У янги ҳудудлардаги хавфсизлик идораларини замонавий техника, қурол-яроғ ва тажрибали ходимлар билан таъминлашга ваъда берди. Путин, шунингдек, Федерал хавфсизлик хизматидан фуқароларнинг оммавий йиғиладиган жойлари, стратегик объектлар, транспорт ва энергетика инфратузилмасини доимий назоратда сақлашни сўради.
«Ҳозир контрразведка идораларидан, жумладан, ҳарбийлардан максимал шайлик, кучларни жамлаш талаб этилади. Хорижий разведка хизматларининг ҳаракатларини кескин бостириш, сотқинлар, жосуслар ва қўпорувчиларни тезда аниқлаш зарур», — деди Путин Кремль сайтида эълон қилинган мурожаатида.
Шунингдек, у ФХХ чегара хизмати фаолиятини кучайтиришга чақирди ва давлат чегараси «ишончли ҳимояланиши, уни бузишга уринишлар мавжуд куч ва воситалар, жумладан, мобил операциялар ва махсус кучлар бўлинмаларидан фойдаланган ҳолда тез ва самарали тўхтатилиши керак»лигини айтди.
Россия президентининг сўзларига кўра, «дунёдаги жадал ўзгарувчан вазият» шароитида мамлакат хавфсизлик идораларининг бутун тизимига «талаблар ортиб бормоқда», шунинг учун «асосий соҳаларда ишни жиддий кучайтириш» зарур.
«Айниқса, Россиянинг янги ҳудудларида иш бошлаган хавфсизлик идоралари бўлинмаларини алоҳида таъкидламоқчиман. Ҳа, ҳозир сиз учун қийин: Донецк ва Луганск халқ республикалари, Херсон ва Запорожье вилоятларида вазият ниҳоятда оғир», — деди Россия раҳбари. Унинг фикрича, янги ҳудудлар аҳолисининг «максимал хавфсизлигини таъминлаш, уларнинг ҳуқуқ ва эркинликларига риоя этилиши учун барча зарур ишларни қилиш» хавфсизлик ходимларининг бурчидир.
Бундан ташқари, Путин экстремизмга қарши курашга «эътиборни сусайтирмаслик»га чақирди. У «жамиятнинг ички бирлигига» тўғридан-тўғри таҳдидни «жанговар миллатчилик, зўравонликка даъватлар, этник адоватни қўзғатишга қаратилган провокациялар» деб атади.
Изоҳ (0)