Belarusning Polonka temir yo‘l stansiyasiga (Brest viloyati, Baranovich tumani) Rossiya Qurolli kuchlari texnikasi ortilgan navbatdagi eshelon yetib keldi. Bu haqda “Belaruski Gayun” monitoring guruhi xabar berdi.
Ekspertlar qayd etishicha, vagonlar Moskva viloyatidagi Selyatino stansiyasidan yetib kelgan, platformalarda 15 dan ortiq benzovoz, kamida beshta “KamAZ”, uchta Ural va BTR-80A tashib keltirilgan. Shuningdek, vagonlardan uchtasi yuk vagonlari bo‘lgan.
“Polonka temir yo‘l stansiyasi Obuz-Lesnovskiy poligoniga bevosita yaqinligini hisobga olsak, texnika ushbu poligonda mashq qilayotgan Rossiya Qurolli kuchlari askarlarini ta’minlash uchun kelganini aytish mumkin”, — deyiladi xabarda.
10-oktabr kuni Belarus prezidenti Aleksandr Lukashenko rossiyalik hamkasbi Vladimir Putin bilan “Ittifoq davlati g‘arbiy chegaralaridagi keskinlik sababli” mintaqaviy qo‘shinlar guruhini kuchaytirish haqida kelishib olganini ma’lum qildi.
15-oktabr kuni esa mintaqaviy qo‘shin guruhlarining rossiyalik harbiylardan iborat dastlabki eshelonlari Belarusga yetib keldi. Keyinroq esa to‘qqiz mingga yaqin Rossiya harbiylari qo‘shma qo‘shinlar guruhini joylashtirish doirasida Belarusga yetib kelishi ma’lum qilindi.
Avvalroq Belarus Mudofaa vazirligi qurolli kuchlarning jangovar tayyorgarligi bo‘yicha mashg‘ulotlar boshlagan edi. Ma’lum qilinishicha, mashg‘ulotlardan ko‘zlangan maqsad qo‘shinlarning jangovar va safarbarlik tayyorgarligini talab darajasida tekshirish, harbiy qo‘mondonlik va nazorat organlarining hamjihatligini oshirishdan iborat. Bundan tashqari, Belarus harbiylari qo‘mondonlarning amaliy ko‘nikmalarini oshirish va shaxsiy tarkibni turli sharoitlarda harakat qilish uchun tayyorlashni rejalashtirmoqda.
Izoh (0)