Ўзбекистонда мандарин нархи кескин пасайди. Бунга нима сабаб бўлмоқда?

Бу йил Покистондан мандарин Марказий Осиё бозорларига нисбатан кеч етказиб берилди. Бу ҳақда EastFruit хабар бермоқда.

Одатда у октябрь ойининг охирида ноябрь ойининг бошида сотувга чиқар эди. Аммо бу йил мева фақат ноябрь ойининг охирида экспорт қилинди.

Одатда Марказий Осиёда Покистон мандаринлари куз ва Янги йил даврида энг арзон, шунингдек, оммавий равишда истеъмол қилинадиган мева ҳисобланади. Шу сабабли, етказиб беришда 4-6 ҳафта кечикиш мева истеъмолининг камайишига олиб келди, чунки йил давомида уларнинг нархи сезиларли даражада ошди.

Айни пайтда Покистон мандаринини чакана савдода 13 минг сўмга харид қилиш мумкин. Бозорларда улгуржи нарх бир килограмм мева учун 11 минг сўмдан паст.

Покистон мандаринининг бозорларга кириб келиши барча турдаги цитрус мевалари ва биринчи навбатда мандаринлар нархининг пасайишига олиб келди.

Бунгача уларнинг чакана нархи килограмми учун 40-50 минггача етган. Улар Ўзбекистонга Хитой, Туркия, Эрон каби давлатлар томонидан етказиб берилган.

Айни пайтда бошқа мамлакатлардан импорт қилинган мандаринлар нархи килограмми учун 20 мингдан пастга тушиб кетган. Бу эса Покистондан мандарин етказиб бериш камайгунича Хитой, Эрон ва Туркиядан импортнинг тўлиқ тўхтатилишига олиб келиши мумкин.

2021 йилда Ўзбекистон рекорд ҳажмдаги — 35,3 минг тонна мандарин импорт қилган, шундан 68 фоизи Покистондан олиб келинган.

Аввалроқ глобал талаб заифлашаётгани сабаб дунёда нархлар пасайиши кутилаётгани ҳақида хабар берилганди.