Ҳиндистоннинг Ҳайдаробод шаҳрида (Теленган штати) кредит ёки дебет пластик карточкаларидаги пул эвазига тилла танга сотиб олиш имконини берувчи банкомат мижозларга хизмат кўрсата бошлади. Бу ҳақда The Economic Times'га таяниб, «ТАСС» хабар бермоқда.
Маълумотларга кўра, бу нафақат Ҳиндистонда, балки бутун дунёда реал вақт режимида ишлайдиган биринчи шундай банкоматдир.
Қурилма Ҳиндистоннинг Goldsikka Pvt хусусий компанияси томонидан ишлаб чиқарилган бўлиб, у қурилма орқали олтин сотишнинг инновацион технологияси ишлаб чиқилди.
Банкоматда 5 килограмм 24 каратли олтин тангалар сақланади. Бу уларни саккизта вариантда — 0,5 граммдан 100 граммгача сотиб олиш имконини беради.
Банкоматнинг муҳим хусусияти шундаки, унинг экранидаги олтин нархи Лондон фонд биржасидаги ушбу қимматбаҳо металнинг котировкалари ўзгаришига мувофиқ реал вақт режимида янгиланади.
Банкомат хакерликдан ишончли ҳимоя тизимига эга. У видеокамера, овозли сигнализация билан жиҳозланган ва полиция билан алоқа линиясига эга.
Голдсикка вакилларининг сўзларига кўра, қурилма барчага банк ёки заргарлик дўконларига бормасдан, молиявий йўқотишлардан қочиб, олтинга сармоя киритиш учун қулай имконият яратади.
Фаолиятининг биринчи кунида инновацион банкомат 20 нафар мижозга хизмат кўрсатди.
Голдсикка Ҳиндистонда 3 мингта шундай банкомат ўрнатиб, ўз маҳсулотлари билан жаҳон бозорига чиқишни режалаштирмоқда.
Аввалроқ долларнинг қадрсизланиши оқибатида олтин нархи ошиб бораётгани ҳақида хабар берилганди.
Изоҳ (0)