Ilon Maskning miyaga implantatsiya qilinadigan chiplarni ishlab chiqaruvchi Neuralink kompaniyasi AQSHda hayvonlarga nisbatan shafqatsiz munosabatda bo‘lgani uchun tergov qilinmoqda. Bu haqda Reuters xabar bermoqda.
Tekshiruv federal prokuror tomonidan boshlangan va uni AQSH Qishloq xo‘jaligi departamenti bosh inspektori boshqarmoqda, — dedi ikki agentlik manbasi.
Korxona faoliyatini tekshirishga kompaniya xodimlarining shikoyatlari sabab bo‘lgan.
Reuters agentligining yozishicha, kompaniya xodimlari hayvonlar ustida sinovlar shoshqaloqlik bilan o‘tkaziladi, bu esa ularning azoblanishi va o‘limiga olib keladi, deb hisoblaydi.
Reuters o‘nlab Neuralink hujjatlarini, jumladan, audioyozuvlar, elektron pochta xabarlari, taqdimotlar va hisobotlarni qo‘lga kiritdi. Agentlik, shuningdek, kompaniyaning 20 dan ortiq amaldagi va sobiq xodimlari bilan ham suhbatlashdi.
Ular muvaffaqiyatsiz tajribalar qayta-qayta takrorlangani uchun sinovdan o‘tkazilgan va o‘ldirilgan hayvonlar soni ko‘payganini aytdi.
Ma’lumotlarga ko‘ra, 2018-yildan buyon tajribalar davomida 1,5 mingga yaqin hayvonlar, jumladan, qo‘ylar, cho‘chqalar va maymunlar o‘ldirilgan.
Materialda ta'kidlanishicha, bu ma’lumotlarning o‘zi Neuralink hech qanday qoidani buzganligini ko‘rsatmaydi — ko‘plab kompaniyalar tadqiqotda hayvonlardan foydalanadi va sinov oxirida ularni o‘ldiradi.
Avvalroq Ilon Mask 6 oydan keyin odamlar miyasiga chip o‘rnatish boshlanishini ma’lum qilgani haqida xabar berilgandi.
Izoh (0)