Буюк Британия Ўзбекистонни ривожланаётган мамлакатлар учун янги савдо схемаси (ДCЦ)га киритди. Унга кўра, 2023 йилдан бошлаб, мамлакат қўшимча товарлар гуруҳини импорт божларисиз етказиб бериш ҳуқуқини олади. Бу ҳақда EastFruit хабар берди.
Мазкур янги савдо схемаси (ДCЦ) 2021 йилнинг октябрь ойи охирида Ўзбекистон бенефициарига айланган Умумий преференциялар тизимининг кенгайтирилган схемасини (GSP Enhanced Framework – GSP ЭФ) ўрнини босади, — дейилади хабарда.
Британия дипломатик ваколатхонасининг ойдинлик киритишича, Ўзбекистон автоматик равишда ривожланаётган мамлакатлар учун янги савдо схемасига киритилади ва бу учун қўшимча тартиб талаб этилмайди.
Шароитлар такомиллашмоқда. Ўзбекистонда ишлаб чиқарилган қўшимча 156 та маҳсулот гуруҳи учун импорт тарифлари нолга тенглашади, — дейди Британия элчихонаси вакиллари.
Ўзбекистон Буюк Британиянинг Кенгайтирилган умумий преференциялар тизими (GSP ЭФ)га қўшилган жаҳондаги биринчи мамлакат бўлди. Бу ҳақида 2021 йилнинг октябрь ойи охирида маълум бўлган эди.
Мазкур қарор Ўзбекистон томонидан 2021 йилнинг апрель ойида тақдим этилган ариза кўриб чиқилиши натижасида қабул қилинган.
2021 йил 1 ноябрь санасидан бошлаб, Буюк Британиянинг GSP ЭФ доирасида Ўзбекистонда ишлаб чиқарилган товарларга нисбатан имтиёзлар қўлланила бошланди.
Бу режим Ўзбекистон учун Буюк Британияга 7 800 турдаги товарларни импорт божисиз экспорт қилиш имконини беради.
2023 йилдан бошлаб, янги ДCЦ савдо схемасига ўтиш натижасида ўзбекистонлик ишлаб чиқарувчиларнинг Буюк Британияга импорт божисиз экспорт қилиши мумкин бўлган товар турлари қўшимча 156 тага кенгайиб, уларнинг умумий сони 7 956 тага етади.
EastFruit экспертлари маълумотларига кўра, 2022 йилнинг январь—октябрь ойларида Ўзбекистондан Буюк Британияга умумий қиймати 20,1 миллион доллардан иборат товарлар экспорт қилиб, ўтган йилнинг шу даврига нисбатан 4 баробар ошган.
Изоҳ (0)