Яқинда Twitter ижтимоий тармоғини сотиб олган тадбиркор Илон Маск ўз ходимларига юборган биринчи мурожаатида компания банкрот бўлиши мумкинлигини айтди. Бу ҳақда Bloomberg ўз манбаларига таяниб хабар берди.
Бундай огоҳлантириш Маск платформани 44 миллиард долларга сотиб олиш бўйича битимни ёпганидан кейин икки ҳафта ўтиб янгради. Бу вақт ичида бизнесмен ходимларнинг ярмини ишдан бўшатди, қолганларга эса уйдан туриб ишлашни тақиқлади. Агентлик ёзишича, Маск 10 ноябрь куни ходимларга жўнатган электрон хатида улар ҳафтасига камида 40 соат офисда ишлаши кераклиги ҳақида огоҳлантирган.
Bloomberg маълумотларига кўра, Маскнинг янги жамоасидаги икки раҳбар ходим — Йоэль Рот ва Робин Уилер истеъфо берган. Аввалроқ эса Twitter’нинг ахборот хавфсизлиги бўлими бошлиғи Леа Кисснер ҳам ишдан бўшаб кетганди.
Шундан кейин АҚШ Федерал савдо комиссияси (FTC) компаниядаги «сўнгги воқеаларни чуқур хавотир билан кузатаётгани»ни маълум қилди.
Ўз хатида Маск Twitter Blue пулли обуна сервисини ривожлантириш зарурлигини қайд этган, у ойига 8 доллар тўлаш эвазига аккаунтни верификация қилиш (расмийлик белгисини қўйиш) имконини беради. Бу L’Oreal, General Motors ва бошқа компаниялар Twitter’да рекламадан вақтинчалик воз кечаётган бир пайтда амалга оширилган. Financial Times ёзишича, реклама берувчилар контент модерациясида ўзгаришлар юзага келиши эҳтимолидан хавфсирамоқда.
Маск верификация белгиси (кўк «галочка») учун тўлов жорий этилиши ҳақида шу ой бошидаёқ эълон қилганди. Бу аввалроқ уни бепул қўлга киритган таниқли шахслар ва компаниялар профилларига ҳам тегишли бўлади.
Изоҳ (0)