Украина мудофаа вазири Алексий Резников Россияга Днепрнинг ўнг қирғоғидан, жумладан Херсондан қўшинларини олиб чиқиш учун камида бир ҳафта керак бўлишини айтди. Бу ҳақда у 10 ноябрь куни кечқурун Reuters агентлигига берган интервьюсида гапирди.
Резниковнинг сўзларига кўра, Херсон вилоятида Россиянинг 40 минг аскари бор. У Россия чекиниш ҳақида эълон қилган бўлса-да, рус қўшинлари ҳамон Херсонда, шаҳар атрофи ва Днепр дарёсининг ўнг қирғоғида қолаётганини таъкидлади.
Бу қўшинларни Херсондан бир-икки кун ичида олиб чиқиб кетиш унчалик осон эмас. Бунинг учун камида бир ҳафта керак бўлади, — деди вазир. У Россиянинг ҳаракатларини олдиндан айтиш қийинлигини ҳам қайд этди.Херсон вилояти ҳудудида жойлашган Украина Қуролли Кучлари қуруқликдаги қўшинларининг «Жануб» тезкор қўмондонлиги 11 ноябрга ўтар кечаси хабар беришича, Россия Днепрнинг икки қирғоғи ўртасида ҳарбийлари ва техникасини ташишда давом этмоқда, чап қирғоқда мудофаа чизиқларини қурмоқда, ўнгда эса Украина Қуролли кучлари позицияларини ўққа тутмоқда. Хабарда таъкидланишича, Украина қўшинлари ҳам фронт чизиғини чап қирғоққа яқинлаштиришда давом этмоқда, Россия кучлари бўлса дарёни «зудлик билан кесиб ўтишга яроқли қайиқларни йиғмоқда».
Украина Қуролли кучлари маълумотларига кўра, Россия ўз қўшинларини қисман олиб чиқиб кетган, бироқ бўлинма ва техниканинг бир қисми ҳамон Днепрнинг ўнг қирғоғида қолмоқда, — деб хабар берди 10 октябрь куни кечқурун «Жануб» кучлар гуруҳи вакили Наталя Гуменюк. Унинг таъкидлашича, Украина Қуролли кучлари россияликларнинг ҳаракатларини кузатиб бормоқда ва эҳтимолий ёлғон манёврлардан хабардор.10 ноябрь куни кечқурун Украина президенти Владимир Зеленский Украина жанубида 41 та аҳоли пункти озод қилинганини маълум қилди. У ҳудудлар айнан қачон озод этилганига аниқлик киритмади. Шу билан бирга, Украина Қуролли кучлари Бош штаби 9 ноябрь куни Херсон йўналишида 12 та аҳоли пункти озод қилинганини маълум қилди. Украина Қуролли кучлари томонидан яна қайси шаҳар ёки шаҳарлар эгаллаб олингани айтилмаган. 10 октябрь куни Украина ҳарбийлари Днепрнинг ўнг қирғоғидаги муҳим логистика маркази бўлган Николаев вилоятидаги Снигирёвкани озод қилгани ҳақида хабар берди.
Шу билан бирга, Херсондаги вазият ҳақида жуда кўп қарама-қарши ва тасдиқланмаган маълумотлар мавжуд. Масалан, Херсоннинг Украина қўшинлари томонидан ўраб олингани Украина Қуролли кучлари томонидан инкор этилмоқда.
Бундан ташқари, Россия ОАВларининг «ҳарбий мухбирларга» таяниб хабар беришича, Херсон вилоятида Днепр орқали ўтувчи Антонов кўприги, шунингдек, яқин атрофда жойлашган темир йўл кўприги гўёки портлаш оқибатида бутунлай вайрон бўлган. Реадовка нашрининг таъкидлашича, портлашлар Россия армияси Днепрнинг ўнг қирғоғини бутунлай тарк этганидан кейин содир бўлган. Ушбу маълумотларни мустақил тасдиқлашнинг имкони йўқ.
Эслатиб ўтамиз, Россия қўмондонлиги 9 ноябрь куни Днепрнинг чап қирғоғидан, жумладан, Россия қўшинлари Украинага бостириб кирганидан кўп ўтмай эгаллаб олган Херсон шаҳридан чекинишини эълон қилганди. Аммо Украина Россия Херсонни жангсиз топширишига ишонмаяпти.