Украинадаги можарони Россия қўшинлари олиб чиқиб кетилгандан кейингина ҳал қилиш мумкин, деди АҚШ президенти Жо Байден Мериленд штатидаги Андреwс авиабазасига кетаётиб.
«Мен Россия президенти Владимир Путин ҳарбий кучларни Украинадан олиб чиқмагунча, можаро ҳал бўлади деб ўйламайман», — деди Байден журналистларга.
Киев бир неча бор Россия армиясининг мамлакат ҳудудидан олиб чиқилишини Москва билан музокаралар шарти деб атаган. Жумладан 8 ноябрь кунги баёнотида президент Владимир Зеленский Украина Россиядан «ҳудудий яхлитликни тиклашини, БМТ Низомини ҳурмат қилишини, уруш оқибатида етказилган барча зарарни қоплашини, ҳар бир ҳарбий жиноятчини жазолашини ва бу бошқа такрорланмаслигига кафолат беришини» кутаётганини таъкидлади.
Кейинроқ Зеленскийнинг Россия билан музокара шартлари ҳақидаги баёноти АҚШнинг «енгилгина турткиси» билан боғлиқ бўлгани ҳақида хабар берилди.
30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.
4 октябрь куни эса Украина расман Путин билан ҳар қандай музокаралардан бош тортди.