Сеул ва Вашингтон ўртасидаги махфий қурол-яроғ битими доирасида АҚШ биринчи марта Жанубий Кореядан Украина Қуролли кучлари учун мўлжалланган артиллерия снарядларини сотиб олади. Бу ҳақда The Wall Street Journal нашри манбаларга таяниб хабар берди.
Шартнома билан таниш америкалик расмийлари АҚШ Украинага етказиб бериш учун 155 миллиметр калибрли 100 мингта артиллерия ўқларини сотиб олишини айтди. Бу миқдор камида бир неча ҳафталик шиддатли жанговар ҳаракатларда Украина артиллерия бўлинмаларини таъминлаш учун етарли.
Келишув Сеулга Украинага ҳалок қилувчи қурол етказиб бермаслик бўйича ўз мажбуриятини бузмасликка имкон беради, Вашингтон эса ўз снарядлари захирасини йўқотмайди, деб ёзмоқда газета.
Октябрь ойи охирида Жанубий Корея президенти Юн Сок Ёл унинг мамлакати Украинага ҳеч қачон ҳалокатли қуроллар етказиб бермагани ва ҳар доим гуманитар ёрдам билан чекланиб келганини айтди.
11 ноябрь куни Жанубий Корея мудофаа вазирлиги Сеул Украинага қурол етказиб бериш ниятида эмаслигини маълум қилди. Вазирнинг таъкидлашича, АҚШ билан келишув Пентагоннинг ўқ-дорилар захирасини тўлдириш учун зарур. Сеул снарядларни фақат Қўшма Штатлар фойдаланиши шарти билан АҚШга топширади, дея қўшимча қилди вазирлик.