Мексиканинг собиқ президенти Луис Эчеверрия Альварес 100 ёшида вафот этди. Бу ҳақда амалдаги давлат раҳбари Андрес Мануэль Лопес Обрадор Twitter’даги саҳифасида маълум қилди.
Мексика раҳбарининг сўзларига кўра, сиёсатчи 9 июль, шанбага ўтар кечаси Куэрнавакадаги уйида вафот этган.
«1970 йилдан 1976 йилгача олти йиллик муддатга Мексика президенти бўлган Луис Эчеверрия Альвареснинг оила аъзолари ва яқинларига Мексика ҳукумати номидан чуқур ҳамдардлик билдираман», — деб ёзган Лопес Обрадор.
Луис Эчеверрия Альварес ҳукумати ислоҳотчилик характеридаги бир қатор ижтимоий ва иқтисодий тадбирларни амалга оширган. Ташқи сиёсатда у турли ижтимоий тузумга эга давлатларнинг тинч-тотув яшаши тамойилига амал қилган, улар ўртасида тенг ҳуқуқли ишбилармонлик ҳамкорлигини ёқлаган.
Собиқ президент рок мусиқасига қарши курашгани билан ёдда қолган. 1971 йилдаги 300 минг кишилик фестивалда мусиқачилар ҳукуматни танқид қилганидан сўнг сиёсатчи радиода рок эшиттиришни, клублар ва катта саҳналарда концертлар ўтказишни тақиқлаган. У лавозимини тарк этгач, тақиқлар олиб ташланди.
Изоҳ (0)