Истеъфога чиқишини эълон қилган Британия бош вазири Борис Жонсон кейинги сайловларда сиёсатни тарк этиш тўғрисида ўйламоқда. Бу ҳақда The Telegraph хабар берди.
Нашр манбаларига кўра, Жонсон ҳозирча депутатлик мандатидан воз кечмоқчи эмас, бироқ айни пайтда ўзидан олдинги бош вазир Тереза Мей каби жамоатлар палатасида қолиш-қолмаслигига ишончи комил эмас.
Жонсон учун эҳтимолий вариантлардан бири — публицистик фаолиятга ёки маърузаларга қайтиш, деб ёзади газета. Hodder & Stoughton нашриёт уйи ундан Уильям Шекспирнинг таржимаи ҳолини кутмоқда, мақола 2016 йилда драматург вафотининг 400 йиллиги муносабати билан чиқиши керак эди. Жонсон 88 000 фунт стерлинг миқдорида аванс олиб қўйган, бироқ сиёсатчи Буюк Британия ташқи ишлар вазири этиб тайинланганидан сўнг нашриёт мақолани «вақти келгунча кечиктиришга рози бўлган».
Апрель ойида Жонсон коронавирус пандемияси даврида Даунинг-стритдаги базмлар билан боғлиқ жанжалларга қарамай, у бош вазир курсисида қолиши ва 2024 йилга белгиланган навбатдаги парламент сайловларида қатнашиши мумкинлигига ишонч билдирган эди.
Бироқ 7 июль куни, Британия ҳукумати аъзоларининг оммавий истеъфога чиқиши фонида, у консерваторлар партияси раҳбари ва бош вазир лавозимларини тарк этишини эълон қилди. Жонсон партия янги етакчини сайламагунча ўз лавозимида қолади.
Буюк Британия бош вазири лавозими учун кураш режаларини, жумладан, собиқ соғлиқни сақлаш вазири Сажид Жавид, собиқ ташқи ишлар вазири Жереми Хант, собиқ молия вазири Риши Сунак ва бошқалар эълон қилди.
Жонсон ўз фаолиятини Times ва Daily Telegraph газеталарида журналист сифатида бошлаган ва бир неча йил Telegraph’нинг Брюсселдаги бюросида ишлаган. У 2001 йилда Консерватив партиядан депутат бўлди ва 2008 йилда Лондон мэри этиб сайланди. 2016–2018 йилларда Жонсон Тереза Мей кабинетида ташқи ишлар вазири лавозимида ишлаган. У 2019 йилнинг ёзида бош вазир бўлган эди.
Изоҳ (0)