Ангола собиқ президенти ва энг бадавлат россиялик аёлнинг отаси вафот этди

Ангола собиқ президенти Жозе Эдуарду душ Сантуш Испанияда 79 ёшида вафот этди. Бу ҳақда мамлакат маъмурияти Facebook’даги саҳифаси орқали маълум қилди, деб ёзади «РБК».

У узоқ давом этган касалликдан кейин Барселонадаги касалхонада вафот этди. Анголада миллий мотам эълон қилинди.

Сантуш ўлимидан аввал икки ҳафта мобайнида кома ҳолатида ётган. Собиқ президент Барселонадаги уйида бахтсиз ҳодисани бошидан ўтказгач, ўпка етишмовчилиги ташхиси билан касалхонага жойлаштирилган эди.

Айнан нима юз берганига аниқлик киритилмаяпти, аммо Сантушнинг қизларидан бири Чизе душ Сантуш отасини ўлдириш мақсадида уюштирилган фитна ҳақида гапирган.

У собиқ президентнинг шахсий шифокори Жоао Афонсу ва Сантушнинг беваси Ана Паулани отасининг саломатлиги ёмонлашишига олиб келган ҳаракатларни қасддан содир этганликда айблади, улар, гўёки, Сантуш Анголада катта таъсирга эга бўлган сиёсатчи сифатида 24 августда бўлиб ўтадиган сайловларда мухолифатни қўллаб-қувватлашидан хавфсираган.

Cаталан News 4 июль куни Чизе полицияга ариза бериб, отасига уюштирилган эҳтимолий суиқасдни текширишни сўраганини ёзганди. Шунингдек, у ҳукуматдан шифокор ва тиббий ходимлар томонидан хизмат мажбуриятларига совуққонлик билан муносабатда бўлиш, саломатликка эҳтиётсизлик оқибатда зарар етказиш ва шахсий сирни ошкор қилиш билан боғлиқ ҳолат юз берган-бермагани юзасидан суриштирув ўтказишни сўраган.

Собиқ президентнинг қизи фикрича, сўнгги йилларда Ангола ҳукумати томонидан унга бириктирилган шифокорлар аста-секинлик билан унинг соғлиғини ёмонлаштирган, оқибатда Сантушни кома ҳолатига киритиш зарурияти юзага келган. Cаталан News ёзишича, шифокорлар даволашни давом эттириб бўлмаслиги туфайли, президентни ҳаётни сақлаб туриш қурилмаларидан узиб қўйишни талаб қилган.

Душ Сантуш 1979 йилдан 2017 йилгача Ангола президенти лавозимини эгаллаган.

У 1960 йилларда Озарбайжон нефть ва кимё институтида ўқиган. Президентлиги даврида у СССР кўмагидан фойдаланган ва мамлакатга бир неча марта ташриф билан келган. Леонид Брежневдан бошлаб душ Сантуш Константин Черненкодан ташқари (Ангола президенти унинг дафн маросимига борган) барча совет етакчилари (кейинроқ Россия етакчилари билан ҳам) билан учрашган.

Душ Сантушнинг биринчи рафиқаси СССР фуқароси Татяна Куканова бўлган. Уларнинг ягона қизи Изабел душ Сантуш Африкадаги биринчи миллиардер аёлга айланган.

2016 йилда отаси уни Анголанинг энг йирик Sonangol нефть компаниясига раҳбар этиб тайинлади. 2017 йилда Изабел бу лавозимдан бўшади ва мамлакатни тарк этди. 2019 йилда у турмуш ўртоғи, Конго Демократик Республикаси фуқароси ва коллексионер тадбиркор Синдика Доколо билан бирга Дубайга кўчиб кетди.

Forbes маълумотларига кўра, 2020 йилда собиқ президент қизининг бойлиги 2,2 миллиард долларни ташкил этган, натижада у Африкадаги энг бадавлат аёлга айланган. Бундан ташқари, у Россия фуқароси бўлгани сабабли, энг бадавлат россиялик аёл деб ҳам ҳисобланади.