Meksikaning sobiq prezidenti Luis Echeverriya Alvares 100 yoshida vafot etdi. Bu haqda amaldagi davlat rahbari Andres Manuel Lopes Obrador Twitter’dagi sahifasida ma’lum qildi.
Meksika rahbarining so‘zlariga ko‘ra, siyosatchi 9-iyul, shanbaga o‘tar kechasi Kuernavakadagi uyida vafot etgan.
“1970-yildan 1976-yilgacha olti yillik muddatga Meksika prezidenti bo‘lgan Luis Echeverriya Alvaresning oila a’zolari va yaqinlariga Meksika hukumati nomidan chuqur hamdardlik bildiraman”, — deb yozgan Lopes Obrador.
Luis Echeverriya Alvares hukumati islohotchilik xarakteridagi bir qator ijtimoiy va iqtisodiy tadbirlarni amalga oshirgan. Tashqi siyosatda u turli ijtimoiy tuzumga ega davlatlarning tinch-totuv yashashi tamoyiliga amal qilgan, ular o‘rtasida teng huquqli ishbilarmonlik hamkorligini yoqlagan.
Sobiq prezident rok musiqasiga qarshi kurashgani bilan yodda qolgan. 1971-yildagi 300 ming kishilik festivalda musiqachilar hukumatni tanqid qilganidan so‘ng siyosatchi radioda rok eshittirishni, klublar va katta sahnalarda konsertlar o‘tkazishni taqiqlagan. U lavozimini tark etgach, taqiqlar olib tashlandi.
Izoh (0)