Кипр президентлигига номзод, ҳукмрон «Демократик йиғинлар» партияси раиси Авероф Неофитоу оролни НАТОга аъзо қилиш таклифини киритди. У партия ташкил топганининг 46 йиллигига бағишланган тадбирда шундай ташаббус билан сўзга чиқди.
Неофитоу ўзининг 100 банддан иборат «Кейинги кун режаси» сайлов дастурини тақдим этди ва унинг партияси «Кипр хавфсизлигини таъминлашга прагматик ёндашаётганини» айтди. Шунинг учун у оролни НАТОга аъзо қилиш учун ариза беришга чақирди.
«Биз табуни олиб ташлаймиз ва Европа, Евро-Атлантика институтлари ва НАТОни жалб қилишга чақирамиз. Улар Кипр эллинизмининг омон қолишини таъминлайдиган тарзда мамлакатимизнинг самарали хавфсизлигини сақлашга киришсин. Мен Кипр энди НАТО аъзолигига ариза беришни устувор вазифа қилиб қўйиши керак, деб ҳисоблайман», — деди у.
Сиёсатчининг қўшимча қилишича, унинг партияси давлатни қайта ташкил этиш ва конституцияни қайта кўриб чиқиш тарафдори. Унинг фикрича, энди мамлакат 1960 йилдаги тузилмалар доирасида ишлай олмайди.
Президентликка номзод, шунингдек, Кипрни «эркин ва бирлашган», замонавий, рақамли ва яшил ўтиш модели бўлишга чақирди. Оролда адолат ҳам ҳукм суриши керак, бу «шаффофлик, жавобгарлик ва қонун устуворлигини таъминлайди», деди у.
Изоҳ (0)