Хитой Халқ Республикаси (ХХР) раиси Владимир Путиннинг Россияга ташриф буюриш таклифини рад этгани ҳақидаги хабарлар ҳақиқатга умуман тўғри келмайди, дея маълум қилди Кремль вакили Дмитрий Песков.
Таклиф рад этилгани тўғрисида аввалроқ Япониянинг Yomiuri газетаси ўз манбаларига таяниб хабар берганди. Нашр маълумотларига кўра, Си Цзиньпин коронавирусга қарши чекловлар туфайли Россияга бориш қийин бўлишини айтган. Шу муносабат билан Песковдан ХХР етакчиси ҳақиқат ҳам рад жавоби берган-бермагани ҳақида сўрашди.
«Йўқ, ундай эмас… Гап шундаки, Хитойда муайян коронавирус чекловлари давом этмоқда. Бу мутлақо нормал ҳолат… Путинда Хитойга ташриф буюриш, Си Цзиньпинда эса Россияга ташриф буюриш бўйича амалдаги таклифлар бор», — дея жавоб қилди Россия президенти матбуот котиби.
Yomiuri эслатишича, Си Цзиньпин 2020 йил январи охиридан буён хорижий мамлакатларга бормаган. Нашр тахмин қилишича, ХХР етакчиси 2022 йил кузида бўлиб ўтадиган Хитой Компартияси қурултойи арафасида ҳам ички, ҳам ташқи сиёсатда кескин қадамлар қўймасликка интилмоқда, ушбу қурултойда у, катта эҳтимол билан, учинчи моддатга қолади. Москвага ташриф ҳам Хитойнинг Россияга санкциявий босимни кучайтираётган АҚШ ва Европа билан муносабатларидаги инқирозни чуқурлаштириши мумкин.
Ўтган сафар Путин ва Си Цзиньпин февраль бошида, Россия президентининг Пекиндаги Олимпия ўйинлари очилиш маросимига ташрифи чоғида кўришган эди. Давлат раҳбарларининг музокаралари уч соат давом этди. Якунда Россия ва Хитой қўшма баёнот эълон қилди, унда ХХР Россиянинг НАТОга нисбатан талабини қўллаб-қувватлади, Россия эса Тайваннинг мустақиллигини тан олмасликка ваъда берди ва коронавируснинг келиб чиқиши масаласи сиёсийлаштирилишини қоралади.
Россиянинг Украинадаги махсус операцияси бошланганидан кейин Хитой Ғарбнинг Москвага қарши санкцияларига қўшилмади ва вазият тинч йўл билан ҳал қилинишини ёқлаб чиқди. Си Цзиньпин ўз маслаҳатчиларига чеклов чораларини бузмаган ҳолда Россияга молиявий кўмак бериш йўлини ўйлаб топишни буюрди. Вашингтон эса Москвага моддий ёрдам ажратса, Пекинни бунинг оқибатлари кутиши ҳақида огоҳлантирди. АҚШ президенти Жо Байденнинг сўзларига кўра, Хитой ўзининг иқтисодий келажаги Россия билан эмас, асосан Ғарб билан боғлиқлигини тушуниши керак.
Аввалроқ АҚШ президенти Жо Байден маъмурияти Хитойнинг бешта компаниясини Россия армиясига ҳарбий ёрдам берганликда айблаб қора рўйхатга киритган эди.
Изоҳ (0)