Испанияда гиёҳванд моддалар контрабандаси учун мўлжалланган сувости дронлари мусодара қилинди (видео)

Испания полицияси Марокашдан денгиз орқали наркотик моддаларни олиб ўтиш учун мўлжалланган учта сувости дронини қўлга олди. Бу ҳақда The Local хабар берди.

Испания полицияси маълумотларига кўра, ушбу сувости аппаратлари 200 килограммгача юкни кўтаришга қодир. Дронлар француз наркосавдогарларига сотиш учун мўлжалланган, улар эса қурилмалардан кокаин ташиш учун фойдаланишни режалаштирган, дейилади маълумотларда. Қайд этилишича, дронлардан бири тўлиқ қурилган, яна иккитаси ҳали қурилаётган бўлган.

Полиция Кадис, Малага ва Барселона шаҳарларида гиёҳванд моддалар савдоси ва жиноий ташкилотга тегишли бўлган саккиз кишини ҳибсга олди. Ҳибсга олиш Франция полицияси билан ҳамкорликда 14 ой давом этган тергов натижаси бўлди.

Жиноий гуруҳ Италия, Франция ва Даниядаги жиноий мижозларга ҳам логистика хизматларини таклиф қилган. Бундан ташқари, улардан 14 килограмм гашиш, 8 килограмм марихуана, 157 минг 300 евродан ортиқ нақд пул ва 6 дона йирик дрон мусодара қилинди.

Полиция баёнотида айтилишича, Испания расмийлари гиёҳванд моддаларни ташиш учун мўлжалланган сувости дронларига биринчи марта дуч келмоқда.