Луврда «Мона Лиза» картинасига торт чаплашга уринишди (видео)

Париждаги Лувр музейида сақланувчи, Леонардо да Винчи қаламига мансуб машҳур «Жоконда» картинаси ҳужумга учради, деб ёзади Meduza.

29 май, якшанба куни кекса аёл кийимини кийиб олган эркак музейга аравачада келиб, «Мона Лиза» картинасига яқинлашган ва уни тўсиб турган ҳимоя шишасига торт чаплашни бошлаган. Шундан кейин у залга атиргулларни сочиб ташлаган.

Вандал полиция томонидан қўлга олинган, у залдан олиб чиқиб кетилаётганида инглиз тилида «Ер ҳақида қайғуришимиз керак»лиги ҳақида гапирган. ОАВлар тахмин қилишича, гап «табиат ҳимоячилари акцияси» ҳақида бораётган бўлиши мумкин.

Лувр раҳбарияти ва ҳуқуқ-тартибот органлари ҳодиса юзасидан изоҳ берганича йўқ. Воқеа ҳақида гувоҳларнинг ижтимоий тармоқлардаги постларидан маълум бўлди.

Дунёдаги энг машҳур картиналардан бири «Мона Лиза» бир неча марта вандалларнинг ҳужум объектига айланган. 1956 йилда Лувр ташрифчиларидан бири унга кислота сепиб юборган. Ўша йили картинага тош ҳам отишган, натижада бўёқ қатламига зарар етган. 1974 йилда, «Жоконда» Токиода кўргазма қилинаётган пайтда бир аёл картинага бўёқ сепишга уринган. 2009 йилда эса россиялик аёл да Винчининг картинасига чашка улоқтирган ва кейинроқ ўз хатти-ҳаракатини Франция фуқаролигини олиш бўйича рад этилгани билан изоҳлаган.

«Жоконда»ни ҳатто ўғирлаб ҳам кетишган. 1911 йилда картинани Луврдан италиялик рассом Винченцо Перужа олиб қочиб кетган. Кейинроқ у итальян рассомининг асарини Италияга қайтармоқчи бўлганини айтган. Картина икки йилдан кейин топилган.