Россия президенти Владимир Путиннинг соғлиғи ёмонлашгани ҳақидаги хабарлар ҳақиқатга тўғри келмайди. Бу ҳақда Россия ташқи ишлар вазири Сергей Лавров Франциянинг ТФ1 телеканалига берган интервьюсида маълум қилди, деб ёзади «РБК».
Вазир журналистнинг Путиннинг саломатлиги ҳақидаги саволига жавоб бераётиб, Россия етакчиси ҳар куни омма олдига чиқаётганини, ҳамма уни экранлар орқали кузатиб, нутқларини эшитаётганини таъкидлади.
«Ақли расо одамлар бу одамда қандайдир хасталик ёки дармонсизлик белгиларини кўриши мумкин, деб ўйламайман. Буни шундай миш-мишлар тарқатаётган одамларнинг виждонига ҳавола қиламан», — дея қайд этди у.
ТФ1 журналисти ундан «Россия президенти бетобми ва унинг Украинадаги махсус операция бўйича дастлабки режаси гўёки бажарилмаганидан ғазабланяптими?» деб сўраганди. Лавров ҳарбий операция режа бўйича бораётганини таъкидлади. Дипломатнинг сўзларига кўра, операция муддатлари ноҳарбий объектларга зарбалар берилишига йўл қўймаслик ҳақидаги буйруқ билан изоҳланади.
Март охирида Лаврор Россия мудофаа вазири Сергей Шойгунинг саломатлиги билан боғлиқ муаммолар ҳақидаги маълумотни рад этиб, бундай хабарларни «уйдирма» ва «ғирт ёлғон» деб атаган эди.
Мавзуга доир:
- Шойгу Украинага ҳужум атайдан секин олиб борилаётганини айтди
- «Кимдир аралашса, кескин жавоб қайтарамиз. Ҳеч ким мақтана олмайдиган ускуналарга эгамиз». Путин Украинадаги уруш сабаб яна Ғарбга таҳдид қилди
- Сергей Лавров ядровий уруш хавфи мавжудлигини маълум қилди
- Лавров Украинадаги «махсус операция»нинг янги босқичи бошланганини маълум қилди. У ядровий қуролдан фойдаланмасликка ваъда берди
Изоҳ (0)