Бутун дунёда озиқ-овқат маҳсулотлари билан боғлиқ вазият ёмонлашмоқда. Таҳлилчиларга кўра, буғдой захиралари 10 ҳафтада етади. Қишлоқ хўжалиги вазирлиги Ғаллачилик ва дуккакли дон экинлари бошқармаси бошлиғи ўринбосари Абдулла Мансуров Ўзбекистон бундай вазиятга қанақа тайёргарликлар кўриб қўйгани тўғрисида маълумот берди.
Унинг сўзларига кўра, аҳоли дон ва ун тақчиллигидан хавотирланмаса ҳам бўлади, мамлакат нафақат дон мустақиллигига эришган, балки уни экспорт ҳам қилади.
«2020 йилда республика бўйича ўртача ҳосилдорлик гектаридан 57 центнерни ташкил этган бўлса, 2021 йилда 64 центнерга етди. 2022 йилда эса гектаридан 70 центнер дон олишни режалаштириб турибмиз. Бундай ҳосилдорликнинг ортиши янги навларнинг, уни экишга ажратиладиган ер майдонларининг ошиши ҳисобига амалга ошяпти. Авваллари ғалла уруғликлари асосан давлат корхоналари, дон маҳсулотлари институтлари томонидан четдан олиб келинарди. Мана ўтган йили кластер, фермер хўжаликлари томонидан 2,8 минг тоннадан ортиқ уруғлик дон олиб келинди ва уларни экиш майдонлари кенгайтирилди», — дейди Мансуров.
Экспертнинг айтишича, ўзбек фермерлари тритикале навларини ҳам олиб келишган. Ушбу ғалла нави ҳосили ва сомони мўлроқ бўлгани учун аҳоли истеъмолига янада кўпроқ фойда келтиради.
«Яна шуниям айтиш керакки, майдонларнинг кенгайиши, ҳосилдорликни ортгани ҳисобига республикада ўтган йилдаги дон захираси 2022 йилнинг август ойигача етарли. Июнь ойида эса далаларимиздан 7 миллион тоннадан ортиқ ғалланинг янги ҳосилни йиғиштириб оламиз. Ушбу ҳосил ўтган йилдагидан 1 миллион тоннадан ортиқ бўлиши режалаштирилмоқда. Республикамиз аҳолиси истеъмоли ва бошқа эҳтиёжлари учун 5,5 миллион тонна дон етарли бўлади. Яна 2 миллион тонна ортиқ дон етиштириш чорва, парранда, балиқни ҳам озиқлантиришга ва бу дон орқали бошқа соҳаларнинг ривожланишига олиб келади», — дея таъкидлайди у.
Аввалроқ Ўзбекистонга йил бошидан бери Қозоғистондан 1,1 млн тонна буғдой импорт қилингани тўғрисида хабар берилганди.
Изоҳ (0)