Parijdagi Luvr muzeyida saqlanuvchi, Leonardo da Vinchi qalamiga mansub mashhur “Jokonda” kartinasi hujumga uchradi, deb yozadi Meduza.
29-may, yakshanba kuni keksa ayol kiyimini kiyib olgan erkak muzeyga aravachada kelib, “Mona Liza” kartinasiga yaqinlashgan va uni to‘sib turgan himoya shishasiga tort chaplashni boshlagan. Shundan keyin u zalga atirgullarni sochib tashlagan.
Vandal politsiya tomonidan qo‘lga olingan, u zaldan olib chiqib ketilayotganida ingliz tilida “Yer haqida qayg‘urishimiz kerak”ligi haqida gapirgan. OAVlar taxmin qilishicha, gap “tabiat himoyachilari aksiyasi” haqida borayotgan bo‘lishi mumkin.
Luvr rahbariyati va huquq-tartibot organlari hodisa yuzasidan izoh berganicha yo‘q. Voqea haqida guvohlarning ijtimoiy tarmoqlardagi postlaridan ma’lum bo‘ldi.
Dunyodagi eng mashhur kartinalardan biri “Mona Liza” bir necha marta vandallarning hujum obyektiga aylangan. 1956-yilda Luvr tashrifchilaridan biri unga kislota sepib yuborgan. O‘sha yili kartinaga tosh ham otishgan, natijada bo‘yoq qatlamiga zarar yetgan. 1974-yilda, “Jokonda” Tokioda ko‘rgazma qilinayotgan paytda bir ayol kartinaga bo‘yoq sepishga uringan. 2009-yilda esa rossiyalik ayol da Vinchining kartinasiga chashka uloqtirgan va keyinroq o‘z xatti-harakatini Fransiya fuqaroligini olish bo‘yicha rad etilgani bilan izohlagan.
“Jokonda”ni hatto o‘g‘irlab ham ketishgan. 1911-yilda kartinani Luvrdan italiyalik rassom Vinchenso Peruja olib qochib ketgan. Keyinroq u italyan rassomining asarini Italiyaga qaytarmoqchi bo‘lganini aytgan. Kartina ikki yildan keyin topilgan.
Mavzuga doir:
- “Jokonda”ni mashhur qilgan o‘g‘rilik. Da Vinchining shoh asari haqida qiziqarli faktlar
- Luvr muzeyida o‘z xonasi va pochta qutisi bor san’at asari. 3-noyabr – “Mona Liza” afsonasining boshlanishi
- Namanganlik o‘qituvchi ayol “Jokonda”ning kashtadagi tasvirini yaratdi. U asar uchun taklif etilgan 1000 dollarni rad etdi
Izoh (0)