Bugun,

  • USD 10940.05
  • RUB 182.26
  • EUR 11121.65

Namangan viloyatining Chust tumanidagi Karkidon qishlog‘ida yashovchi Marg‘uba Ne’matullayeva kashtada Leonardo da Vinchining mashhur “Mona Liza” asarini aks ettirdi. Bu haqda “Daryo” muxbiri Azizbek Abduvaliyev xabar bermoqda.

Foto: Jo‘rabek Mahmudov

Foto: Jo‘rabek Mahmudov

Marg‘uba 47 yoshda, kasbi o‘qituvchi. Namangan va Farg‘onadagi maktab, kollej va sport maktablarida 20 yildan oshiq vaqt mobaynida jismoniy tarbiyadan dars bergan.

U jozibali tabassumi tufayli yoqtirib qolgani “Mona Liza”ni yaratish uchun 6 oy vaqt sarfladi. Buning uchun 10 ming marotaba igna-ip o‘tkazgan, 46 xil rangdan foydalanilgan. O‘zining aytishicha, bu rekord emas ekan. “Jokonda”dan o‘lchami kichik bo‘lgan meva natyurmortini tayyorlashda 86 ming marta igna-ip va 120 xil rang qo‘llangan. Shu sabab u zamonaviy kashtachilikning matematika va aniq hisob-kitobni yoqtiradigan san’at turiga qiyoslaydi.

Foto: Jo‘rabek Mahmudov

Foto: Jo‘rabek Mahmudov

“Ko‘rgazmalardan birida “agar Leonardo da Vinchi shu asarini chizishdan avval o‘zbek ayolini ko‘rganida ‘Mona Liza’ albatta sizlardan andoza olingan bo‘lardi” deb lutf qilishdi. Samarqanddagi tadbirga olib borganimda bu portret uchun italiyalik mehmonlar 1000 dollar taklif etishdi. Bergim kelmadi, chunki bu qo‘l mehnati, uning bahosi aslida bir necha karra yuqori ekanligini bilaman”, — deydi u.

Foto: Jo‘rabek Mahmudov

Foto: Jo‘rabek Mahmudov

Qahramonimizning aytishicha, do‘ppi tikish va kashtachilikka bolaligidan qiziqqan. Uyida hozirgacha onasi 15 yoshida tikkan kashtalar saqlanadi. 2013-yilda Toshkentga, Gyote institutiga borganida zamonaviy kashtachilik qanday bo‘lishini ko‘rib, mahorat saboqlari olganidan so‘ng ishtiyoqi qaytadan uyg‘ongan.

Foto: Jo‘rabek Mahmudov

Foto: Jo‘rabek Mahmudov

“Hozir bo‘sh qoldim deguncha qo‘limga igna-ip olaman. Behuda gap-so‘z, ko‘cha kezishlarga vaqtim ham, xohishim yo‘q. Tabiat, gul va mevalar, jonivorlarni aks ettirishni yaxshi ko‘raman. Kichikroq asarni tayyorlash uchun bir oy, kattaroqlariga esa 4-6 oy muddat ketadi. Kashtachilikdan toliqqan paytim voleybol yoki basketbol o‘ynayman, suzish bilan shug‘ullanaman, dutor chalaman. 14 yoshga to‘lgan qizim Xushro‘y yonimga kirib qoldi. U ham kashta tikadi, dutor chaladi. Yaqinda qo‘l jangi bo‘yicha O‘zbekiston chempioni bo‘ldi. O‘g‘illarim Xushro‘z va Xushnud esa Buxoro tibbiyot instituti hamda Janubiy Koreyaning Kyongsan universiteti talabalari. Ular bilan juda faxrlanaman”, — deydi Marg‘uba.

Foto: Jo‘rabek Mahmudov

Foto: Jo‘rabek Mahmudov

Marg‘uba Ne’matullayevaning asarlari hozir Rossiyaning Samarada shahridagi o‘zbek restoranlarini bezab turibdi. U kelgusida ham kashtachilikni tashlab qo‘yish niyatida emas. Qo‘qonda bo‘lib o‘tadigan xalqaro hunarmandchilik festivaliga astoydil tayyorgarlik ko‘rmoqda. Yaqin orada esa yana bir mashhur musavvir — Rembrandt asarlarini kashtaga ko‘chirmoqchi.

Izoh
Asosiy yangiliklar
Mahalliy
Putinparast raqqos Toshkentda urushga chorlovchi qo‘shig‘i uchun senzura qilinganini aytmoqda. O‘zi nima bo‘lgandi?
Dunyo
Ganjani vayron qilgan 11 ballik zilzila, Gutenberg chop etgan ilk kitob, Suriyada harbiy operatsiya boshlagan Rossiya qo‘shinlari. Kun xronologiyasida 30-sentabr
Dunyo
Rossiya Zaporojye va Xerson viloyatlari mustaqilligini tan oldi