Москванинг Лефортово суди 22 март куни россиялик мухолифатчи Алексей Навальнийни фирибгарлик ишида айбдор деб топди. Бу ҳақда «ТАСС» хабар берди.
«Навальний фирибгарлик содир этди, яъни алдов йўли билан ўзганинг мулкига эга чиқди», — дейди судья Маргарита Котова.
Шунингдек, суд Алексей Навальнийни судьяни ҳақорат қилишда ҳам айбдор деб топган. «Навальний судга очиқдан очиқ ҳурматсизлик кўрсатадиган хатти-ҳаракатларни амалга оширди», — дейди у.
Владимир вилоятининг Покров шаҳридаги колонияда ўтказилган кўчма суд йиғилишида Навальнийга нисбатан ҳукм эълон қилинди: у тўққиз йилга оғир режимдаги колонияга ҳукм қилинди, шунингдек, 1,2 миллион рубль (11,4 минг доллар) миқдорида жаримага тортилди.
Аввалроқ, мунозаралар давомида давлат айбловчиси Навальнийни 13 йиллик колонияга ҳукм қилиш ва 1,2 миллион рубль миқдорида жаримага тортишни сўраган эди.
Навальнийга нисбатан фирибгарлик иши 2020 йилнинг охирида очилган. Тергов қўмитасининг маълум қилишича, Навальний турли фондларга, жумладан Коррупцияга қарши курашиш фондига ўтказилган 588 миллион рублнинг 356 миллионини шахсий мақсадларда сарфлаган. Судга ҳурматсизлик иши эса Навальний устидан уни фахрийга туҳмат қилишда айблаб ўтказилган бошқа суддан кейин пайдо бўлди. Ушбу суд 2021 йилнинг май ойи охирида бўлиб ўтган ўшади. Икки иш кейинроқ бирлаштирилган.
Маълумот учун, мухолифатчи Алексей Навальний 2021 йилнинг 17 январь куни Россияга Германиядан қайтиб келди, у ерда қарийб беш ой давомида бўлиб, «Новичок» билан заҳарланганидан кейин даволанди. Тарафдорлари уни кутиб олиш учун Внуково аэропортига келди. У ерда оммавий ҳибсга олишлар бўлиб ўтди, Навальний ўтирган самолёт эса Шереметьевога қайта йўналтирилди. Қўнганидан кейин сиёсатчи қўлга олинди — «Ив Роше» иши бўйича шартли маҳкум мажбуриятларини бузганлиги учун.
18 январь куни Навальний қамаб қўйилди, суд эса тўғридан-тўғри полиция бўлимида ўтказилди. 19 январь куни Навальний томонидан ташкил қилинган Коррупцияга қарши кураш фонди (ККФ) «Путиннинг қасри» ҳақидаги фильмни эълон қилди. У 100 миллион мартадан ортиқ томоша қилинди, ижтимоий тармоқлар эса шу мавзудаги мемларга тўлиб кетди. Ҳукумат унинг қаср эмас, апарт-меҳмонхона эканлигини ва унга Путин эмас, балки унинг дўсти Аркадий Ротенберг эгалик қилишини маълум қилди.
Навальнийнинг тарафдорлари бутун Россия бўйлаб оммавий норозилик акцияларини уюштирди. 23 январь куни тўрт мингдан ортиқ, 31 январь куни беш мингдан ортиқ одам ҳибсга олинди. Кўп йиллардан буён бунақаси бўлмаганди. Федерал телеканаллар «хушмуомала полициячилар» ҳақида ҳикоя қилди, аслида эса улар намойишчиларга қарши дубинка, электрошокер ва кўзни ёшлантирувчи газ қўллаган эди (Кремль буни провокацияга жавоб деб атади).
Акциялардан кейин камида 40 та жиноят иши қўзғатилди. Навальнийнинг сафдошлари Любов Собол ва Кира Ярмиш, шунингдек, сиёсатчининг укаси Олег митингда коронавирусга қарши чораларни бузганлик учун уй қамоғига ҳукм қилинди. Навальнийнинг яна бир сафдоши Леонид Волков ўсмирларни кўча акцияларига жалб қилганлик учун қидирувга берилди.
Москванинг Симонов туманлараро суди 2 февралда Навальнийни «Ив Роше» иши бўйича айбдор деб топиб, унинг жазони колонияда ўташи ҳақида қарор чиқарганди. Москва шаҳар суди 20 февралда қарорни қонуний деб топди ва суд ҳукми кучга кирди.
Навальний ўша ҳукм бўйича колонияда 2,5 йиллик жазони ўтамоқда. 2022 йилнинг январида у террорчилар ва экстремистлар реестрига киритилди.
Изоҳ (0)