Украина президенти Владимир Зеленский Украина хавфсизлик кафолатларини олганидан сўнг, Россия билан Қрим масаласини муҳокама қилишга ва Донбасс республикаларини тан олишга тайёрлигини маълум қилди.
«Бу барчамиз учун оғир тарих. Қрим ҳам, Донбасс ҳам — барча учун. Бу борада бирор ечимни топиш учун мен айтган биринчи қадамни ташлаш керак: хавфсизлик кафолатлари, урушнинг тўхтатилиши», — дейди у Европа ва Украинадаги қатор телекомпанияларга берган интевюсида.
Зеленскийнинг сўзларига кўра, у ушбу масалаларни Россия президенти Владимир Путин билан учрашувда муҳокама қилишга тайёр. «Россия президенти билан биринчи учрашувдаёқ ушбу масалаларни кўтаришга тайёрман, улар биз учун муҳим… Аммо ишончим комилки, ечим мазкур учрашувда қабул қилинмайди. Чунки очиқ айтадиган бўлсам, хавфсизлик кафолатлари масаласида биз конституцион ўзгаришлар қилиш, Украина қонунчилигини ўзгартириш ҳақида гапирамиз. Демак, бу ҳақида гапирадиган бўлса, уни нафақат президент ва Рада, балки Украина халқи ҳал қилади», — дейди у.
20 март куни CNN телеканалига берган интервьюсида Зеленский Киев Украина ўз суверенитети ва ҳудудий яхлитлигини йўқотмайдиган моделни топиши кераклигини маълум қилганди. Шу билан бирга, 21 март куни кечаси Чехия телевидениесига берган интервьюсида Зеленский «муросага келиш — бу ниманинг эвазига келаётган нарса эканини билишингиз керак, биз эса еримизнинг бир қаричидан ҳам воз кеча олмаймиз. Биз Донбасс ва Қримни қайтариб олиш учун барча ишни қилишимиз керак».
Аввалроқ Россия президентининг ёрдамчиси Владимир Мединский Киев музокараларда Украинада «нейтрал демилитаризация қилинган давлатнинг Австрия ёки Швеция варианти»ни яратишни таклиф қилаётганини билдирган. Россия президентининг матбуот котиби Дмитрий Песков журналистларга Украинада бу каби нейтрал давлат варианти муҳокама қилинаётгани, у муросага келиш йўли сифатида кўриб чиқилиши мумкинлигини маълум қилган.
Изоҳ (0)