Ўзбекистонда 2022 йилнинг 1 январь ҳолатида ишсизлик даражаси 9,6 фоизни ташкил этди. Бу ҳақда Бандлик ва меҳнат вазирлиги хабар қилди.
Қайд этилишича, кўрсаткич ўтган йилнинг шу даврига нисбатан 0,9 фоизга камайган бўлса, 2021 йилнинг январь сентябрь ойларига нисбатан 0,2 фоизга ортган. 2022 йилнинг 1 январь ҳолатига кўра, меҳнат ресурслари сони 19 миллион 345 минг кишини ташкил этиб, 2020 йилнинг шу даврига нисбатан 101,1 фоизга ёки 202,6 минг кишига ошган. Иқтисодиёт тармоқларида банд бўлганлар сони 13 миллион 538,9 минг кишини ташкил этиб, 2021 йилнинг мос даврига нисбатан 2,3 фоизга (299,3 минг кишига) ошган.
Мавзуга доир: Ўзбекистонда 2021 йилнинг тўққиз ойи давомида ишсизлик даражаси 9,4 фоизни ташкил этди
Ўтказилган тадқиқот натижаларига кўра, ишга муҳтож бўлганларнинг умумий сони 1 миллион 441,8 минг кишини, ишсизлик даражаси иқтисодий фаол аҳоли орасида 9,6 фоизни ташкил этган. 16—30 ёшгача бўлганлар орасида ишсизлик даражаси 15,1 фоиз, аёллар орасида ишсизлик даражаси эса 13,3 фоиз бўлган.
2021 йилнинг январь—декабрь ойларида Аҳоли бандлигига кўмаклашиш марказларига 879,5 минг нафар фуқаро иш топишга ёрдам сўраб мурожаат қилган. Уларнинг 393,8 минг нафари иш билан таъминланган. 2021 йилда 281,3 минг ишсиз аҳолини ишга жойлаштириш белгиланган бўлиб, йиллик дастур 140 фоизга бажарилган. Шунингдек, 2020 йилнинг мос даврига нисбатан 108,5 фоизга ошган. Ишга жойлашишга кўмаклашилган шахсларнинг 203,6 минг нафари (51,7 фоизи) аёллар, 160,8 минг нафари (40,8 фоизи) ёшларни ташкил этган.
Эслатиб ўтамиз, Бандлик ва меҳнат муносабатлари вазирлиги мутасаддилари иштирокида 2022 йилга соҳада амалга оширилиши белгиланган асосий вазифаларга бағишланган матбуот анжумани бўлиб ўтганди. Унда айтилишича, касбга ўқитиш кўламини 2 баробар ошириш ва 2022—2026 йилларда 1 миллион ишсизни касбга ўқитиш режалаштирилган.
Изоҳ (0)