O‘zbekistonda 2022-yilning 1-yanvar holatida ishsizlik darajasi 9,6 foizni tashkil etdi. Bu haqda Bandlik va mehnat vazirligi xabar qildi.
Qayd etilishicha, ko‘rsatkich o‘tgan yilning shu davriga nisbatan 0,9 foizga kamaygan bo‘lsa, 2021 yilning yanvar-sentabr oylariga nisbatan 0,2 foizga ortgan. 2022 yilning 1 yanvar holatiga ko‘ra, mehnat resurslari soni 19 million 345 ming kishini tashkil etib, 2020-yilning shu davriga nisbatan 101,1 foizga yoki 202,6 ming kishiga oshgan. Iqtisodiyot tarmoqlarida band bo‘lganlar soni 13 million 538,9 ming kishini tashkil etib, 2021-yilning mos davriga nisbatan 2,3 foizga (299,3 ming kishiga) oshgan.
Mavzuga doir: O‘zbekistonda 2021-yilning to‘qqiz oyi davomida ishsizlik darajasi 9,4 foizni tashkil etdi
O‘tkazilgan tadqiqot natijalariga ko‘ra, ishga muhtoj bo‘lganlarning umumiy soni 1 million 441,8 ming kishini, ishsizlik darajasi iqtisodiy faol aholi orasida 9,6 foizni tashkil etgan. 16—30 yoshgacha bo‘lganlar orasida ishsizlik darajasi 15,1 foiz, ayollar orasida ishsizlik darajasi esa 13,3 foiz bo‘lgan.
2021-yilning yanvar—dekabr oylarida Aholi bandligiga ko‘maklashish markazlariga 879,5 ming nafar fuqaro ish topishga yordam so‘rab murojaat qilgan. Ularning 393,8 ming nafari ish bilan ta’minlangan. 2021 yilda 281,3 ming ishsiz aholini ishga joylashtirish belgilangan bo‘lib, yillik dastur 140 foizga bajarilgan. Shuningdek, 2020-yilning mos davriga nisbatan 108,5 foizga oshgan. Ishga joylashishga ko‘maklashilgan shaxslarning 203,6 ming nafari (51,7 foizi) ayollar, 160,8 ming nafari (40,8 foizi) yoshlarni tashkil etgan.
Eslatib o‘tamiz, Bandlik va mehnat munosabatlari vazirligi mutasaddilari ishtirokida 2022-yilga sohada amalga oshirilishi belgilangan asosiy vazifalarga bag‘ishlangan matbuot anjumani bo‘lib o‘tgandi. Unda aytilishicha, kasbga o‘qitish ko‘lamini 2 barobar oshirish va 2022—2026-yillarda 1 million ishsizni kasbga o‘qitish rejalashtirilgan.
Izoh (0)