Ўзбекистонда 2021 йилнинг январь—декабрь ойларида 98,8 минг нафар ишсизга 87,1 миллиард сўм ишсизлик нафақаси тайинланди. Бу ҳақда Бандлик ва меҳнат вазирлиги хабар қилди.
Қайд этилишича, 2021 йил давомида 37,3 минг ишсизлар, жумладан, «аёллар дафтари», «ёшлар дафтари»га киритилган шахсларга 83,1 миллиард сўм субсидия маблағлари ажратилган. Жумладан, тадбиркор сифатида давлат рўйхатидан ўтказиш, асбоб-ускуна, меҳнат қуролларини харид қилиш, «Ҳунарманд» уюшмасига аъзолик бадали харажатларини қоплаш учун 6 минг 781 нафар фуқароларга 4,8 миллиард сўм ажратилган.
Шунингдек, шахсий ва дала томорқасида иссиқхона, экишга уруғлар ва кўчатлар ҳамда суғориш воситаларини ҳарид қилиш учун 18 минг 608 та оилага 52,7 миллиард сўм берилган. 228 та ишлаб чиқариш кооперативлари ташкил этилиб, уларга 9,9 минг нафар ишсизлар бириктирилган. Аъзолик улуши сифатида 21,8 миллиар сўм субсидия тўланган.
2021 йилда жами 506,2 мингта янги иш ўрни ташкил этилган. Прогнозга нисбатан 110,7 фоизга бажарилган. Кўрсаткич 2020 йилга нисбатан 118,3 фоизга ўсган, 78,4 мингтага кўп. Шу жумладан, меҳнат бозорида талаб юқори бўлган 54 турдаги касблар, тадбиркорлик кўникмалари ва хорижий тиллар бўйича 115,4 минг нафар ишсиз касб-ҳунарга ўқишга жалб этилган. Уларнинг асосий қисми хотин-қизлар (68,4 фоиз), ёшлар (54,4 фоиз) улушига тўғри келган.
Аввалроқ Ўзбекистонда 2022 йилнинг 1 январь ҳолатига кўра ишсизлик даражаси 9,6 фоизни ташкил этгани хабар қилинганди (драфтда). Қайд этилишича, кўрсаткич ўтган йилнинг шу даврига нисбатан 0,9 фоизга камайган.
Эслатиб ўтамиз, 2022 йилда касбга ўқитиш кўламини 2 баробар ошириш ва 2022—2026 йилларда 1 миллион ишсизни касбга ўқитиш режалаштирилган. Хотин-қизларни касб-ҳунарга ўқитиш 2 бараварга оширилиб, йилига 80 мингга етказилади.
Изоҳ (0)