Ереван Лукашенконинг Арманистон Россия—Беларусь иттифоқига қўшилиши ҳақида айтган гапларига муносабат билдирди

Беларусь президенти Александр Лукашенко телебошловчи Владимир Соловёвга берган интервьюсида Собиқ Иттифоқи республикаларининг аксарияти, жумладан, Арманистон ҳам Беларусь ва Россия иттифоқ давлатига қўшилиши мумкинлигини айтганди. Ереван Лукашенконинг баёнотига муносабат билдирди.

«Беларусь президентининг тор доирадаги геосиёсий таҳлили, биринчи навбатда, ўзининг ички сиёсий кун тартибига хизмат қилишига аминмиз, буни Арманистон ва унинг ташқи сиёсатига ҳеч қандай даҳли йўқ», — деди Арманистон ташқи ишлар вазири Ваган Унанян.

Интервьюсида Лукашенко Украина ва Қозоғистон 15 йил ичида Россия ва Беларусь иттифоқ давлатига қўшилиши ҳақида фикр билдирган. «Арманистон ҳам қаерга боради? Улар кимгадир керак деб ўйлайсизми?», — дея қўшимча қилган у. Лукашенконинг сўзларига кўра, Ўзбекистон, Туркманистон ва Тожикистон ҳам «иқтисодий зарурат» туфайли янги уюшмага қўшилади.

Кейинроқ Ўзбекистон жамоатчилиги Лукашенконинг гапларига муносабат билдирди.

«Бугун кўплаб ривожланган давлатлар Лукашенкони Беларусь халқи номидан гапира олмайдиган шахс деб ҳисоблайди. Шунинг учун, бугунги кунда бу инсоннинг Ўзбекистон ҳақидаги фантазияларини жиддий қабул қилиш шарт эмас», — дея таъкидлайди «Юксалиш» умуммиллий ҳаракати раиси Бобур Бекмуродов.

Иттифоқ давлати — бу Россия ва Беларуснинг интеграция лойиҳаси бўлиб, Москва ва Минск 1990 йилларнинг охирида уни такомиллаштиришни бошлаган. Лойиҳа парламент, валюта ва қонунчиликни умумлаштиришни назарда тутади. 20 йилдан ортиқ давом этган ҳамкорлик тарихида томонлар шу пайтгача фақат солиқ ва божхона қонунчилигини синхронлаштиришга яқинлашган. Беларусь раҳбари Александр Лукашенконинг айтишича, иттифоқ интеграция босқичлари учун муддат белгиламайди.