«Толибон» ҳаракати вакиллари делегацияси гуманитар масалаларни муҳокама қилиш учун Швейцарияга келди. Бу ҳақда ушбу делегацияни мамлакатга таклиф қилган Geneva Call нодавлат ташкилоти ижрочи директори Ален Делетро РЦ телеканалига берган интервьюсида маълум қилди.
«Женевага келган вакиллар Кобул расмийлари томонидан юборилган ва умид қиламизки, улар қайтиб кетгач, Афғонистонда инсонпарварлик қонунчилиги ҳурмат қилинишини таъминлаш учун қўлдан келган барча ишни қилади», — дейди Делетро.
Ижрочи директорнинг қайд этишича, «Толибон» делегацияси билан учрашув уларнинг расман тан олинишини билдирмайди. «Гуманитар ташкилот билан мулоқот уларни қонунийлаштирмайди ва уларнинг халқаро мақомида ҳеч нарса ўзгармайди. Уларни фақат халқаро конвенциялар ва халқаро гуманитар ҳуқуқни ҳурмат қилиш орқали қонунийлаштириш мумкин», — дея таъкидлайди у.
РЦ маълумотларига кўра, Афғонистон делегацияси Швейцарияга 6 январь куни етиб келган. Мамлакат Ташқи ишлар вазирлиги гап Швейцарияга расмий ташриф ҳақида эмас, балки «фуқаролик жамияти томонидан ташкил этилган муҳокамалар» ҳақида кетаётганини билдирган. Шунга қарамай, Швейцария ташқи сиёсий идораси вакиллари толиблар делегацияси билан учрашув ўтказишни режалаштирган. Швейцария томонидан Ташқи ишлар вазирлигининг Тараққиёт ва ҳамкорлик дирекцияси, шунингдек, Осиё-Тинч океани минтақаси ва инсон ҳуқуқлари билан шуғулланувчи таркибий бўлинмалари ходимларининг иштироки этиши кутилмоқда. Дипломатик идоранинг маълум қилишича, мулоқот «ёпиқ эшиклар ортида» бўлиб ўтади.
Ўз навбатида Қизил Хоч халқаро қўмитаси Женевада толиблар билан «диалогни давом эттириш» ниятида эканини ва «конструктив мулоқотга» умид қилишини билдирган.
Аввалроқ Афғонистондаги вазият БМТ ҳисоботида айтилганидан ёмонроқлиги маълум қилинганди. Афғонистонда «Толибон» ҳокимиятга келгач, АҚШ ҳукумати афғон активларини, Жаҳон банки ва Халқаро валюта жамғармаси эса Афғонистон иқтисодиёти ва бошқарувини қўллаб-қувватлашга мўлжалланган маблағларни «Толибон» қўлига тушиб қолишидан ва нотўғри мақсадда ишлатилишидан қўрқиб, музлатиб қўйганди. Россия, Хитой, Покистон ва бир қатор МДҲ давлатлари АҚШ санкциялари оғир аҳволда қолган афғон халқига гуманитар ёрдам етказилишга тўсқинлик қилаётганини даъво қилиб, бу пулларни блокдан чиқаришга чақирмоқда.
Эслатиб ўтамиз, БМТнинг гуманитар масалаларни мувофиқлаштириш бошқармаси 2022 йил январига қадар Афғонистонда давом этаётган гуманитар инқирозни ҳал этиш учун 1,5 миллиард долларга яқин маблағ тўплаган. Ушбу маблағлар қисман афғонларни қишга тайёрлаш, жумладан, нақд пул ва ноозиқ-овқат маҳсулотларини тўғридан-тўғри тақсимлашни қўллаб-қувватлаш учун сарфланган.
Изоҳ (0)