Украина президенти Владимир Зеленский Беларусь президенти Александр Лукашенконинг Россия билан уруш бошланган тақдирда Украинага нефть маҳсулотлари ва электр энергияси етказиб беришни тўхтатиб қўйиши борасидаги таҳдидига муносабат билдирди, деб хабар беради «Liga.net» портали.
Зеленскийнинг сўзларига кўра, мамлакатлар ўртасидаги савдоларнинг бекор қилинишидан айнан Беларусь зарар кўради.
«Яқинда, ўртоқлар, Беларусда бир инсон Россия томонидан ҳарбий ҳаракатлар амалга оширилса, Украинага энергия ресурсларини етказиб беришни тўхтатиб қўйишларини маълум қилди. У инсон шу сўзларни айтди ва биз бунга қандай муносабат билдиришимиз керак?
Мен сизларга қандай муносабатда бўлганимни айтиб бераман. Менга Украина ва Беларусь ўртасидаги товар айланмаси статистикасини беришларини сўрадим. Биздаги товар айланмаси 6 миллиард долларга тенг. Шундан 1,5 миллиард Украина томонидан Беларусга, 4,5 миллиард эса Беларусь томонидан Украинага қилинадиган экспортлардир.
Яъни мамлакатлар бир-бири билан савдони чекласа, ким бундан зарар кўради? Айни вазиятда оддий одамлар. Агар тош асрига қайтиш истаги бўлса, шундай қилса бўлади. Беларусь ниманидир, Украина ҳам ниманидир тақиқлайди. Ҳар доим сиёсатчилар ҳал қилади, жабрини эса афсуски, оддий одамлар кўради», — дейди Зеленский.
6 февраль куни Лукашенко Москва ва Киев ўртасида зиддият кучайган тақдирда Беларусь Украинага ёқилғи-мойлаш материаллари ва электр энергиясини етказиб бермаслигини маълум қилганди.
Таъкидлаш керакки, Украина бензин бозорининг қарийб ярмини импорт ёнилғиси ташкил этади, бунда Беларусдан амалга ошириладиган импорт ҳажми 80 фоизга яқин.
Аввалроқ президент Александр Лукашенко телебошловчи Владимир Соловёвга берган интервьюсида Украина Донбассга қарши уруш бошласа, Беларусь армияси худди Россия армияси каби ҳаракат қилишини айтганди.
Изоҳ (0)