Япония Европага суюлтирилган газ (LNG) захираларининг бир қисмини етказиб беришни режалаштирмоқда, чунки Украина атрофида инқирозли вазиятнинг кучайиши сабаб Европанинг энергия хавфсизлиги таҳдид остида. Бу ҳақда Kyodo агентлиги ҳукуматдаги манбаларга таяниб хабар берди. Худди шундай маълумот NHK телеканалида ҳам эълон қилинди.
Телеканал маълумотларига кўра, Токио АҚШ президенти Жо Байден маъмуриятининг сўровига жавобан газ етказиб беришга тайёрлигини билдирган.
Япония Европа бозорини таъминлашдан олдин ички бозорда мамлакатнинг барча эҳтиёжларини қондириш учун етарли миқдорда ёнилғи мавжудлигига ишонч ҳосил қилади, дейди Kyodo ва NHK манбалари.
Агар Ғарб санкцияларига жавобан Россия газ таъминотини чекласа, Япония Европага газ етказиб бериш имкониятини кўриб чиқаётгани ҳақида ўтган ҳафта Kyodo манбаларига таяниб хабар берганди. Агентликнинг ёзишича, Токио бошқа давлатларни Европа Иттифоқини қўллаб-қувватлашни мувофиқлаштиришга таклиф қилиши мумкин.
«Биз халқаро ҳамжамият доирасида қандай ҳисса қўшишимиз мумкинлигини аниқлаштирмоқчимиз», — дея Япония иқтисодиёт, савдо ва саноат вазири Коичи Хагиуданинг сўзларини келтирган Kyodo.
Февраль ойи бошида Bloomberg манбаларига таяниб, АҚШ ва унинг европалик ҳамкорлари Украинада Россия иштирокидаги ҳарбий можаро юзага келган тақдирда табиий газнинг янги таъминотчиларини қидираётгани ҳақида хабар берганди. Агентлик маълумотларига кўра, Вашингтон ва Брюссель Япония, Жанубий Корея ва Ҳиндистон расмийларига мурожаат қилган. Хитой ҳам потенциал газ етказиб берувчи сифатида кўриб чиқилмоқда, бироқ ҳозирча музокаралар ҳеч қандай натижага олиб келмаган, дейди агентлик манбалари.
Бундан ташқари АҚШ ва Европа Иттифоқи Россиянинг гази чекланса, Қатар, Нигерия, Миср, Ливия ва Жазоир компанияларидан ишлаб чиқаришни кўпайтиришни сўраган.
Кейинроқ Оқ уй АҚШ Россия босқини юз берган тақдирда Европага табиий газ етказиб беришни диверсификация қилиш масаласи устида ишлай бошлагани ҳақида хабар берди.
Европа Иттифоқи томонидан истеъмол қилинадиган газнинг қарийб 40 фоизи Россиядан келади.
Изоҳ (0)