Халқаро меҳнат ташкилоти (ХМТ) 2021 йил августда Афғонистонда ҳукумат тепасига «Толибон» келганидан сўнг ярим миллиондан ортиқ одам ишсиз қолганини маълум қилди, деб хабар беради «Интерфакс».
«Гап фақат учинчи чоракдаги статистика ҳақида кетмоқда. ХМТ экспертлари жорий йилнинг ўрталарига бориб ушбу кўрсаткич 900 мингга етишидан хавотирда», — дейилади БМТ сайтига жойлаштирилган хабарда.
Таъкидланишича, ишсизлик даражасининг бу қадар ортишига аёллар бандлигига қўйилган чекловлар ва кўплаб давлат хизматчиларининг ишдан бўшатилиши, шунингдек, оғир иқтисодий инқироз сабаб бўлмоқда.
ХМТ экспертларининг маълумотларига кўра, агар Афғонистон иқтисодиётида ишлаган соатлар сони бўйича меҳнат бозоридаги йўқотишлар ҳисобга олинадиган бўлса, у ҳолда 2021 йилнинг учинчи чорагида ҳокимият ўзгармагандаги гипотетик сценарийга нисбатан нисбатан 13 фоизни ташкил этган.
«Инқироз энг кўп аёлларга зарар етказди. Чунки шундоқ ҳам жаҳон стандартлари бўйича уларнинг паст бўлган бандлик даражаси ўтган йилнинг учинчи чорагида 16 фоизга тушиб кетди. 2022 йил ўрталарига бориб, ушбу кўрсаткичнинг қулаши 28 фоизга етиши кутилмоқда», — дейилади хабарда.
Шу ҳафта БМТ экспертлар гуруҳи мамлакатда аёллар меҳнати ҳуқуқи бузилаётганидан қаттиқ ташвишда эканини билдирганди. Уларнинг сўзларига кўра, толиблар аёлларга иш жойига қайтишни, шунингдек, эркак киши ҳамроҳлигисиз жамоат жойларида юришни тақиқлаган. Мамлакатда Хотин-қизлар ишлари вазирлиги тугатилиб, Афғонистон Инсон ҳуқуқлари бўйича мустақил комиссияси бинолари тортиб олинган.
Аввалроқ Афғонистоннинг Ғазни вилоятида «Толибон» ҳукуматининг мулозимлари шифокорларга эркаклар ҳамроҳлигисиз қабулига келган аёлларни даволашни тақиқлаганди. Илгари аёллар касалхоналарга қариндошлари ҳамроҳлигида келиши мумкин эди. Бироқ «Толибон» комиссияси аёлларнинг эркаклар бошчилигисиз касалхонага боришини «ноқонуний ва ахлоқсиз» деб топди. Шифокорларга бундай беморларга ёрдам бермаслик, касалхонага ётқизмаслик талаби қўйилган.Aamaj News агентлиги «Толибон» ҳаракати аъзолари Кобул кўчаларида қолган юзи очиқ аёлларнинг суратларини йўқ қилишни бошлагани ҳақида хабар берганди. Шунингдек, «Толибон» аёллар иштирок этган бир қатор теледастурларни эфирга узатишни тақиқлаганди.
Изоҳ (0)