Испания ҳукумати ойлик даромади 24 318 евродан кам бўлган 35 ёшдан кичик испанларга ҳар ой 250 евродан ёрдам пули тўлаш бўйича қарор қабул қилди. Ҳукуматнинг фикрича, бу уларга ота-онаси қарамоғидан кўчиб кетишга мотивация беради, деб ёзади Reuters.
Транспорт вазири Ракел Санчес мазкур янгиликни «ёшларга эркин бўлишида тўсқинлик қилувчи уй-жой нархларига боғлиқ муаммони ҳал этишда муҳим қадам» деб атаган. Бу турдаги субсидияни уч йил давомида олиш мумкин.
2020 йилдаги расмий статистикага кўра, Испанияда 22—29 ёш оралиғидаги 55 фоиз одам ота-онаси билан яшайди — бу Европадаги энг юқори кўрсаткичлардан бири. Шу билан бирга, 25 ёшдан кичик испанияликларнинг 29 фоизи ишсиз мақомига эга.
BBC маълумотларида келтирилишича, Испанияда ёшларнинг ўртача маоши ойига 970 еврони ташкил этади. El Pais нашри эса квартира ижараси учун камида бундан икки баробар кўп пул топиш кераклигини таъкидлаган.
Эслатиб ўтамиз, 2020 йилда Японияда коронавирус сабабли аҳолини қўллаб-қувватлаш учун пул тарқатилган эди. Ўшанда мамлакатнинг ҳар бир фуқароси учун 100 минг иена (тахминан, 930 доллар) миқдоридаги нафақа тўланган.
Изоҳ (0)