Liberiya poytaxti Monroviyada bir guruh qurollangan erkaklar cherkovga hujum uyushtirdi. Sodir etilgan bosqinchilik oqibatida 29 kishi halok bo‘lgan, ularning 11 nafari bolalar, deb xabar beradi Reuters.
Fojia 19-yanvar kuni kechasi Nyu-Kru-Taun tumanida sodir bo‘lgan. Hujum vaqtida cherkovda yuzlab odam bo‘lgani aytilmoqda.
“Tesaka (otkir tig‘li sovuq qurol) va boshqa qurollarni ko‘tarib olgan erkaklar guruhi olamonga yaqinlashib kelayotganini ko‘rdik… Qochish vaqtida ayrim odamlar yiqildi, boshqalar ularni bosib ketdi”, — deydi guvohlardan biri. Uning ta’kidlashicha, bosqinchilar ibodat uchun kelgan fuqarolarni o‘marmoqchi bo‘lgan.
Shifokorlarning ma’lumotlariga ko‘ra, jarohat olganlarning bir qanchasi og‘ir ahvolda, shu sababli qurbonlar soni ortishi mumkin. Mahalliy OAVlarning yozishicha, to‘polonda bir homilador ayol ham halok bo‘lgan.
Liberiya prezidenti Jorj Vea voqea joyiga tashrif buyurib, mamlakatda halok bo‘lganlar xotirasiga uch kunlik motam e’lon qilgan.
Ijtimoiy tarmoqlarda guvohlar fojia joyidagi kadrlarni, shuningdek, jarblangan va halok bo‘lganlarning oyoq kiyimlari hamda ust-boshlari to‘plangan suratlarni e’lon qilmoqda.
Avvalroq Nigeriyadagi maktabda sodir bo‘lgan yong‘inda 25 bola halok bo‘lgani, shuningdek, Nigeriyada qurolli shaxslarning masjidga qilgan hujumi oqibatida 18 kishi qurbon bo‘lgani to‘g‘risida xabar berilgandi.
Izoh (0)