Nigeriya hukumati mamlakat shimoli-g‘arbida avvalroq jangarilar tomonidan qo‘lga olingan 100 nafar ayol va bolalar ozod etilganini e’lon qildi, deb yozadi France 24.
Foto: Global Look Press
Mamlakatning Zamfara shtatida 8-iyun kuni bir guruh ayollar va bolalar garovga olinib, o‘g‘irlab ketilgan. Hodisada to‘rt kishi halok bo‘lgan. Politsiya ma’lumotlariga ko‘ra, bolalar va ayollar 42 kun davomida asirlikda saqlangan.
Zamfara shtati hukumati garovga olinganlar tovon pulisiz ozod qilinganini aytdi, ammo boshqa tafsilotlar oshkor etilmadi. Manbalarning nashrga aytishicha, politsiya va shtat rasmiylari jangarilarni odam o‘g‘irlash ishi bo‘yicha ularga qarshi hech qanday choralar ko‘rilmasligiga ishontirgandan so‘ng, qaroqchilar o‘g‘irlangan qishloq aholisini ozod qilishga rozi bo‘lgan.
Qayd etilishicha, guruh uylariga qaytishdan oldin tibbiy ko‘rikdan o‘tkaziladi.
Nashrning yozishicha, jinoiy guruhlar Nigeriyaning shimoli-g‘arbiy va markaziy qismidagi aholini qo‘rqitmoqda. Ular qishloqlarga hujum qilib, chorva mollarini o‘g‘irlamoqda, shuningdek, tovon puli evaziga ozod qilish sharti bilan mahalliy aholi yoki sayohatchilarni o‘g‘irlab ketmoqda.
Qurollangan jinoiy guruhlar Nigeriyaning Zamfara, Katsina, Kaduna va Niger shtatlarini qamrab olgan Rugu o‘rmonidagi lagerlarda joylashib olgani aytilmoqda.
May oxirida Niger shtatida qurollangan jangarilar maktabga hujum qilib, 200 nafar o‘quvchini o‘g‘irlab ketgandi.
Undan avval jangarilar Zamfara shtatida maktabga hujum uyushtirib, 317 nafar o‘quvchi qizni o‘g‘irlab ketgani haqida xabar berilgandi. Ushbu voqeadan to‘rt kun o‘tib o‘quvchi qizlar qaytarilgan. Bolalarning qaytishi to‘g‘risida viloyat hukumati vakili Yusuf Idris e’lon qilgan. Ammo u o‘quvchi qizlarning aynan qanday qutqarilgani va ular uchun to‘lov to‘lash kerakmi yoki yo‘qligini aytmagan. Qizlarning barchasi sog‘-salomat qaytib kelgan.
