Афғонистонда 2021 йил август ойида ҳокимият тепасига келган ва ўз ҳукуматини тузган «Толибон» ҳаракати Европа иттифоқининг Кобулдаги ваколатхонаси фаолиятини қайтадан бошлаганини маълум қилди. Бу борадаги баёнот толиблар томонидан Афғонистон ташқи ишлари вазирлиги матбуот котиблигига тайинланган Абдулқаҳҳор Балхий томонидан Twitter’га жойлаштирилган, деб хабар бермоқда «ТАСС».
«Бир қатор учрашувлар ва Евроиттифоқ вакиллари билан келишувлардан кейин ЕИ Кобулдаги ваколатхонасининг фаолиятини қайта тиклади ва амалий жиҳатдан ишлашга киришди», – дея ёзган толиблар вакили.
Бундан ташқари, хабарда Евроиттифоқнинг Афғонистон халқига ижтимоий ёрдам сифатида ажратган 220 миллион евродан ташқари яна 265 миллион евро маблағ юборилиши ва ушбу пуллар ўқитувчилар маоши учун ажратилиши қайд этилган.
«Толибон» 2021 йилда АҚШ ўз қўшинларини Афғонистон ҳудудидан олиб чиқиб кетишни бошлаганидан кейин мамлакатда ҳукуматни эгаллаш учун кураш бошлаганди. Ўтган йили 15 августда толиблар Кобулни жангсиз эгаллади, президент Ашраф Ғани эса республикадан чиқиб кетди.
Шундан кейин бир нечта мамлакатлар ва халқаро ташкилотлар Кобулдаги ваколатхоналар, элчихона ва консулликларда ишловчи ходимлари, уларга хизмат қилган афғонистонликларни пойтахтда эвакуация қилишни бошлади. Брюссель Евроиттифоқ мамлакатларининг Афғонистондан жами 17,5 минг нафар одамни, хусусан ЕИнинг Кобулдаги миссиясида ишлаган 520 нафар европаликлар, улар билан бирга ишлаган маҳаллий аҳоли вакиллари ва уларнинг оила аъзолари Кобулдан бошқа жойга кўчирилганини билдирган.
2021 йил декабрь ойининг бошларида Европа иттифоқи ташқи сиёсий хизматининг вакили Набила Массрали бир неча ҳафта ичида ЕИ ваколатхонаси Кобулда қайта иш бошлаши, бироқ бу Брюсселнинг «Толибон» Афғонистонда тузган ҳукуматни тан олганлигинин англатмаслиги ҳақида гапирганди.
Изоҳ (0)