Тошкентдан учадиган самолёт туман туфайли Андижонга қўнмайдиган бўлди

Uzbekistan Airways’нинг 24 декабрь куни Тошкентдан учадиган самолёти қуюқ туман туфайли Андижонга қўнмайдиган бўлди. Бу ҳақда компания матбуот хизмати хабар берди.

Маълум қилинишича, метеорологик шароит тобора ёмонлашиб бораётганлиги (туман, кўришнинг етарли даражада эмаслиги) муносабати билан фақатгина 24 декабрь куни HY091/Тошкент—Андижон авиақатнови Тошкент—Фарғона муқобил йўналиши бўйича амалга оширилади. HY092/Андижон—Тошкент қатнови эса Фарғона шаҳридан амалга оширилади.

Шунингдек, қатнов вақтига ҳам ўзгартириш киритилган. HY-091 қатновининг жўнаб кетиш вақти соат 14:00 га, HY-092 қатновининг жўнаб кетиш вақти эса соат 16:00 га ўзгартирилган.

Йўловчиларга қулайлик яратиш мақсадида Андижон ва Фарғона аэропортлари ўртасида трансфер ҳаракат ташкил этилади.